வெங்கி அட்லூரி இயக்கத்தில் சூர்யா, மமிதா பைஜூ, ராதிகா சரத்குமார் உள்ளிட்டோர் நடிப்பில் வெளியாகியுள்ள ‘விஸ்வநாத் அண்ட் சன்ஸ்’ (Viswanath & Sons) திரைப்படம் ரசிகர்களின் எதிர்பார்ப்புக்கு மத்தியில் திரையரங்குகளில் வெளியாகியுள்ளது. குடும்ப உறவுகள், உணர்வுகள் மற்றும் நகைச்சுவையை மையமாகக் கொண்டு உருவாகியுள்ள இப்படம் எப்படி இருக்கிறது என்பதை பார்க்கலாம்.
மெதுவாக தொடங்கி வேகம் பிடிக்கும் முதல் பாதி
படத்தின் தொடக்கம் சற்று மெதுவாக நகர்கிறது. சில காட்சிகள் செயற்கையாகவும் தோன்றுகின்றன. ஆனால் கதை மெல்ல வேகம் பிடிக்கத் தொடங்கியதும், நகைச்சுவை மற்றும் உணர்வுப்பூர்வமான காட்சிகள் சரியான அளவில் கலந்து கொடுக்கப்பட்டுள்ளன.
Viswanath & Sons படம் கதையின் மையத்திலிருந்து அதிகம் விலகாமல் நகரும் முதல் பாதி, இடைவேளை வரை ரசிகர்களை ஓரளவுக்கு ஈர்க்கிறது. குறிப்பாக மருத்துவமனை காட்சிகள், ட்ரிப் தொடர்பான காமெடி, ஹோட்டலில் இடம்பெறும் சண்டைக் காட்சி ஆகியவை ரசிக்க வைக்கும் பகுதிகளாக உள்ளன.
சூர்யா – மமிதா கூட்டணி எப்படி?
சூர்யா தனது கதாபாத்திரத்தை இயல்பாக கையாண்டுள்ளார். அவரது நடிப்பு படத்திற்கு முக்கிய பலமாக அமைகிறது. மமிதா பைஜூவும் தனக்குக் கொடுக்கப்பட்ட கதாபாத்திரத்தை சிறப்பாக செய்துள்ளார். மமிதா பைஜூ மற்றும் ராதிகா சரத்குமார் இணைந்து வரும் காட்சிகளில் இடம்பெறும் கலகலப்பான தருணங்கள் ரசிகர்களை ரசிக்க வைக்கின்றன.
செம வைபில் வரும் ரெட்ரோ பாடல்
இடைவேளைக்கு முன்பு இடம்பெறும் ரெட்ரோ பாடல் கவனம் ஈர்க்கிறது. பாடல்கள் கதையுடன் ஓரளவுக்கு பொருந்தும் வகையில் அமைந்துள்ளன. குறிப்பாக, முதல் பாதியின் ஒட்டுமொத்த திரை அனுபவத்திற்கு பாடல்கள் கூடுதல் பலம் சேர்க்கின்றன.
இரண்டாம் பாதியில் தடுமாறும் திரைக்கதை
முதல் பாதியில் உருவாக்கப்பட்ட எதிர்பார்ப்பு இரண்டாம் பாதியில் முழுமையாக பூர்த்தியாகவில்லை. தேவையற்ற சில கிளைக்கதைகள் மற்றும் அதிகப்படியான சென்டிமென்ட் காட்சிகள் படத்தின் வேகத்தை குறைக்கின்றன.
மேலும், முதல் பாதியில் இருந்த நகைச்சுவை இரண்டாம் பாதியில் குறைந்து போவது சற்று ஏமாற்றமளிக்கிறது. இரண்டாம் பாதியின் திரைக்கதை இன்னும் வலுவாக அமைக்கப்பட்டிருந்தால், படம் இன்னும் சிறப்பான அனுபவத்தை கொடுத்திருக்கும்.
வசனங்கள் படத்தின் பலம்
இயக்குநர் வெங்கி அட்லூரியின் வசனங்கள் படத்தின் முக்கியமான பலங்களில் ஒன்றாக இருக்கின்றன. கதாபாத்திரங்களின் உணர்வுகளை வெளிப்படுத்தும் பல வசனங்கள் கவனம் பெறுகின்றன.
கிளைமாக்ஸ் பகுதி ஓரளவுக்கு சிறப்பாக கையாளப்பட்டிருப்பதால், படம் முடிவில் முழுமையான ஏமாற்றத்தை ஏற்படுத்தாமல் ஒரு திருப்தியான உணர்வை கொடுக்கிறது.
குடும்பத்துடன் பார்க்கலாமா?
விஸ்வநாத் அண்ட் சன்ஸ்’ (Viswanath & Sons) படத்தில் பெரிய அளவிலான சிக்கல்கள் இல்லாததால், குடும்பத்துடன் ஒருமுறை தாராளமாக ரசிக்கக்கூடிய படமாக உள்ளது. முதல் பாதி விறுவிறுப்பாகவும் ரசிக்கும்படியாகவும் இருந்தாலும், இரண்டாம் பாதியில் வரும் சில தேவையற்ற காட்சிகள் படத்தின் வேகத்தை பாதிக்கின்றன. மொத்தத்தில், சிறிய குறைகள் இருந்தாலும் குடும்ப உறவுகள், நகைச்சுவை மற்றும் சென்டிமென்ட் கலந்த ஒரு எளிமையான ஃபீல் குட் படமாக ‘விஸ்வநாத் அண்ட் சன்ஸ்’ அமைந்துள்ளது.
Verdict: சூப்பர் இல்லை… சுமாரையும் தாண்டிய குடும்பப் பொழுதுபோக்கு
