காவிரி டெல்டா மாவட்டங்களில் கொள்முதல் செய்யப்படாமல் தேங்கிக் கிடக்கும் லட்சக்கணக்கான நெல் மூட்டைகளை உடனடியாக கொள்முதல் செய்து பாதுகாக்க வேண்டும் என அமமுக பொதுச்செயலாளர் TTV Dhinakaran தமிழக அரசை வலியுறுத்தியுள்ளார்.
கொள்முதல் நிலையங்களில் தேக்கம்
தஞ்சாவூர், திருவாரூர் உள்ளிட்ட டெல்டா மாவட்டங்களில் உள்ள நேரடி நெல் கொள்முதல் நிலையங்களில் ஏராளமான நெல் மூட்டைகள் தேங்கியுள்ளதாக தகவல்கள் வெளியாகியுள்ளன. விவசாயிகள் கடும் சிரமங்களுக்கு இடையே விளைவித்த நெல்லை உரிய நேரத்தில் கொள்முதல் செய்யாமல் காலதாமதம் செய்வது கண்டனத்திற்குரியது என தினகரன் தெரிவித்துள்ளார்.
மழையால் நெல் வீணாகும் அபாயம்
அவ்வப்போது பெய்து வரும் மழையால் கொள்முதல் நிலையங்களில் தேங்கியுள்ள நெல் மூட்டைகள் நனைந்து சேதமடையும் அபாயம் ஏற்பட்டுள்ளதாக கூறப்படுகிறது. இதனால் விவசாயிகள் தங்களது விளைபொருளை பாதுகாக்க முடியாமல் கவலையடைந்துள்ளனர்.
நெல் மூட்டைகளை கிடங்குகளுக்கு எடுத்துச் செல்ல போதிய வாகன வசதி இல்லை எனக் கூறி விவசாயிகளை அலைக்கழிப்பதாகவும் தினகரன் குற்றம்சாட்டியுள்ளார்.
விவசாயிகளுக்கு மேலும் நெருக்கடி
காவிரி நீர் பற்றாக்குறை, வறட்சி மற்றும் சாகுபடி தொடர்பான பல்வேறு சிரமங்களை எதிர்கொண்டு விவசாயிகள் நெல் உற்பத்தி செய்துள்ளனர். இந்நிலையில் அறுவடை செய்த நெல்லையே உரிய நேரத்தில் கொள்முதல் செய்ய முடியாத நிலை ஏற்பட்டிருப்பது விவசாயிகளுக்கு மேலும் நெருக்கடியை ஏற்படுத்துவதாக அவர் தெரிவித்துள்ளார்.
“போர்க்கால நடவடிக்கை தேவை”
டெல்டா மாவட்டங்களில் கொள்முதல் நிலையங்களில் தேங்கியுள்ள அனைத்து நெல் மூட்டைகளையும் உடனடியாக கொள்முதல் செய்ய வேண்டும். மேலும், அவற்றை பாதுகாப்பான கிடங்குகளுக்கும், அரவை ஆலைகளுக்கும் விரைந்து அனுப்பி வைக்க நடவடிக்கை எடுக்க வேண்டும் என தினகரன் வலியுறுத்தியுள்ளார்.
முதல்வர் விஜய் அழைத்த எம்.பிக்கள் கூட்டம்: திமுக, அதிமுக புறக்கணிப்பு.. தேமுதிகவும் பங்கேற்கவில்லை!
அரசின் தாமதத்தால் விவசாயிகளின் பல மாத உழைப்பு வீணாகாமல் இருக்க முதலமைச்சர் விஜய் உடனடியாக தலையிட்டு போர்க்கால அடிப்படையில் நடவடிக்கை எடுக்க வேண்டும் என்பதே விவசாயிகளின் எதிர்பார்ப்பாக உள்ளது.
