சென்னை உயர்நீதிமன்ற மதுரைக் கிளை, கோயில் நிதிப் பொதுப் பயன்பாட்டுக்காக, அதாவது கல்வி, திருமண மண்டபம், வணிக வளாகம் போன்றவற்றுக்குப் பயன்படுத்தக் கூடாது என்று உத்தரவு பிறப்பித்திருந்த நிலையில், உச்ச நீதிமன்றம் அதற்கு மாறாக, பயன்படுத்தினால் என்ன தவறு? என்று கேள்வி எழுப்பி அதிரடி தீர்ப்பளித்துள்ளது.
வழக்கின் பின்னணி
மயிலாப்பூர் கபாலீஸ்வரர் கோயில் சார்பாக கலை மற்றும் அறிவியல் கல்லூரி ஒன்றை அமைக்க தமிழக அரசு முடிவு செய்தது.
இதற்காக கொளத்தூர் சோமநாத சுவாமி கோயிலின் 2.50 ஏக்கர் நிலம், 25 ஆண்டுகளுக்கு குத்தகைக்கு விட அறிவிப்பு வெளியிடப்பட்டது.
இதற்கு எதிர்ப்பு தெரிவித்து மயிலாப்பூரைச் சேர்ந்த டி.ஆர். ரமேஷ் உயர் நீதிமன்றத்தில் மனு தாக்கல் செய்தார். ஆனால் அவரது மனுவை உயர்நீதிமன்றம் தள்ளுபடி செய்தது.
அதனை எதிர்த்து அவர் உச்ச நீதிமன்றத்தில் மேல்முறையீடு செய்தார்.
உச்ச நீதிமன்றம் விசாரணை
உச்ச நீதிமன்ற நீதிபதிகள் விக்ரம் நாத், சந்தீப் மேத்தா அமர்வில் வழக்கு விசாரிக்கப்பட்டது.
மனுதாரர் தரப்பில், கோயில் நிதி மற்றும் நிலத்தை கல்விக்காக பயன்படுத்தக் கூடாது என வாதிடப்பட்டது.
அதற்கு அறநிலையத்துறை சார்பில், நிலம் வாடகைக்கு விடப்பட்டுள்ளது; கல்விக்காகத்தான் பயன்படுத்தப்படுகிறது என விளக்கம் அளிக்கப்பட்டது.
இரு தரப்பு வாதங்களையும் கேட்ட நீதிபதிகள், மாணவர்களின் எதிர்காலத்துக்காக கல்வி நிறுவனத்தை அமைப்பதில் என்ன தவறு? கோயில் நிதியையும் இடத்தையும் கல்விக்காக பயன்படுத்துவதில் குற்றமில்லை என்று குறிப்பிட்டனர்.
இதனால் மனுதாரரின் மேல்முறையீட்டு மனு தள்ளுபடி செய்யப்பட்டது.
சென்னை உயர்நீதிமன்ற மதுரை கிளை உத்தரவு (ஆகஸ்ட் 28)
திண்டுக்கல் மாவட்டத்தைச் சேர்ந்த ஒருவர் தாக்கல் செய்த வழக்கில், கோயில் நிதி பக்தர்களிடமிருந்து வசூலிக்கப்படும் நிதி. அது மத நடவடிக்கைகள், திருவிழா, பராமரிப்பு போன்றவற்றுக்கே பயன்படுத்தப்பட வேண்டும். அரசு நிதி போல பொதுப் பயன்பாட்டுக்காக பயன்படுத்தக் கூடாது என்று உத்தரவு வழங்கப்பட்டது.
அதன்படி, கோயில் நிதியில் திருமண மண்டபம், வணிக வளாகம், கல்வி நிறுவனங்கள் அமைப்பது செல்லாது என்று தெளிவுபடுத்தப்பட்டது.
நிலைமையின் சிக்கல்
உயர்நீதிமன்றம்: கோயில் நிதி மத நடவடிக்கைகளுக்கே. கல்வி, வணிக, திருமண மண்டபம் போன்றவை இல்லை.
உச்ச நீதிமன்றம்: கல்விக்காக பயன்படுத்தினால் தவறு இல்லை; அது மாணவர்களின் நலனுக்காக.
இப்படி உயர்நீதிமன்றம் – உச்ச நீதிமன்றம் இடையே மாறுபட்ட உத்தரவுகளைப் பிறப்பித்துள்ளன.
