Pregnant Women Schemes : கர்ப்ப காலத்தில் பெண்களுக்கு தேவையான மருத்துவ வசதிகள், ஊட்டச்சத்து மற்றும் பாதுகாப்பான பிரசவம் கிடைப்பதை உறுதி செய்ய மத்திய அரசு பல்வேறு நலத்திட்டங்களை செயல்படுத்தி வருகிறது. குறிப்பாக குறைந்த வருமானம் கொண்ட குடும்பங்களைச் சேர்ந்த பெண்களுக்கு இந்தத் திட்டங்கள் முக்கிய உதவியாக உள்ளன.
1. ஜனனி சுரக்ஷா யோஜனா
மருத்துவமனைகளில் பாதுகாப்பான பிரசவத்தை ஊக்குவிக்கும் நோக்கில் *ஜனனி சுரக்ஷா யோஜனா* திட்டம் செயல்படுத்தப்படுகிறது. தகுதியுடைய கர்ப்பிணிப் பெண்களுக்கு இந்தத் திட்டத்தின் மூலம் நிதியுதவி வழங்கப்படுகிறது. கிராமப்புறம் மற்றும் நகர்ப்புறத்தைப் பொறுத்து உதவித்தொகை மாறுபடும்.
2. பிரதான் மந்திரி மாத்ரு வந்தனா யோஜனா
PMMVY திட்டத்தின் கீழ் தகுதியுள்ள கர்ப்பிணி மற்றும் பாலூட்டும் பெண்களுக்கு நிதியுதவி வழங்கப்படுகிறது. முதல் குழந்தைக்கு ரூ.5,000 வரை இரண்டு தவணைகளில் வழங்கப்படும் நிலையில், இரண்டாவது குழந்தை பெண் குழந்தையாக இருந்தால் ரூ.6,000 உதவி கிடைக்கும் என தெரிவிக்கப்பட்டுள்ளது.
3. தாய் – சேய் பாதுகாப்புத் திட்டம்
ஜனனி ஷிஷு சுரக்ஷா யோஜனா (JSSK) மூலம் அரசு மருத்துவமனைகளில் கர்ப்பிணிப் பெண்களுக்கு பல்வேறு சேவைகள் இலவசமாக வழங்கப்படுகின்றன. சாதாரணப் பிரசவம், சிசேரியன், மருந்துகள், மருத்துவப் பரிசோதனைகள், ரத்தம் மற்றும் மருத்துவமனைக்குச் சென்று வருவதற்கான போக்குவரத்து உள்ளிட்ட வசதிகள் இதில் அடங்கும்.
4. ஆயுஷ்மான் பாரத் திட்டம்
ஆயுஷ்மான் பாரத் – PM-JAY* திட்டத்தின் கீழ் தகுதியுள்ள குடும்பங்களுக்கு ஆண்டுக்கு ரூ.5 லட்சம் வரை மருத்துவக் காப்பீட்டு பாதுகாப்பு வழங்கப்படுகிறது. அதிக ஆபத்துள்ள கர்ப்பம், அவசர மருத்துவமனை சிகிச்சை மற்றும் தேவையான சிசேரியன் போன்ற சிகிச்சைகளும் தகுதிக்கு உட்பட்டு இதில் இடம்பெறுகின்றன.
5. லக்ஷ்யா திட்டம்
பிரசவ அறைகள் மற்றும் மகப்பேறு அறுவை சிகிச்சை பிரிவுகளில் மருத்துவ சேவையின் தரத்தை உயர்த்தும் நோக்கில் LaQshya திட்டம் 2018-ம் ஆண்டு தொடங்கப்பட்டது. கர்ப்பிணிப் பெண்களுக்கு தரமான மற்றும் மரியாதையான சிகிச்சை கிடைப்பதுடன், பிரசவத்தின்போது மற்றும் அதற்குப் பிறகு ஏற்படும் சிக்கல்களை குறைப்பதும் இத்திட்டத்தின் முக்கிய நோக்கமாகும்.
திட்டங்களின் பலனை பெறுவது எப்படி?
கர்ப்பிணிப் பெண்கள் தங்களுக்கு பொருந்தக்கூடிய அரசு நலத்திட்டத்தின் தகுதி மற்றும் விதிமுறைகளை முதலில் தெரிந்துகொள்வது அவசியம். ஒவ்வொரு திட்டத்திற்கும் தனித்தனி தகுதி நிபந்தனைகள் இருப்பதால், சம்பந்தப்பட்ட அரசு சுகாதார நிலையங்கள் அல்லது அதிகாரப்பூர்வ இணையதளங்கள் மூலம் கூடுதல் விவரங்களை சரிபார்த்துக்கொள்ளலாம்.
