தமிழ் சினிமாவின் முன்னணி நடிகைகளில் ஒருவராக இருக்கும் நயன்தாரா, திரையுலகில் அறிமுகமாவதற்கு முன்பு பெற்ற முதல் வருமானம் குறித்த சுவாரஸ்யமான தகவலை பகிர்ந்துள்ளார்.
சினிமாவுக்கு முன் மாடலிங்
சினிமாவில் நடிக்க வேண்டும் என்ற எண்ணம் ஆரம்பத்தில் தனக்கு இல்லை என்று நயன்தாரா தெரிவித்துள்ளார். மாடலிங் துறையில் இருந்தபோது, ஒரு பத்திரிகையின் அட்டைப்படத்துக்கான போட்டோஷூட்டில் பங்கேற்கும் வாய்ப்பு அவருக்கு கிடைத்துள்ளது.
அந்த போட்டோஷூட்டுக்காக ரூ.2,000 முதல் ரூ.3,000 வரை சம்பளமாக பெற்றதாக அவர் கூறியுள்ளார். சினிமாவுக்குள் நுழைவதற்கு முன்பு கிடைத்த முக்கியமான முதல் வருமானமாக இதை அவர் குறிப்பிட்டுள்ளார்.
சிறுவயதில் கிடைத்த ரூ.500
இதற்கு முன்பே தனது சிறுவயதில் ரூ.500* சம்பளமாக பெற்றதாகவும் நயன்தாரா தெரிவித்துள்ளார். தனது தந்தையின் நகங்களை வெட்டியதற்காக அந்த பணம் வழங்கப்பட்டதாக அவர் நினைவுகூர்ந்துள்ளார்.
சினிமா வாய்ப்பு கிடைத்தது எப்படி?
மாடலிங் செய்து கொண்டிருந்த காலத்தில் நயன்தாராவின் புகைப்படம் ஒன்றை இயக்குநர் சத்யன் அந்திக்காடு பார்த்துள்ளார். அதன் பின்னர், 2003-ம் ஆண்டு வெளியான மலையாள திரைப்படமான ‘மனசினக்கரே’ படத்தில் நடிக்கும் வாய்ப்பு அவருக்கு கிடைத்தது.
அந்தப் படத்தின் மூலம் திரையுலகில் அறிமுகமான நயன்தாரா, தொடர்ந்து தமிழ், தெலுங்கு, மலையாளம் உள்ளிட்ட பல மொழித் திரைப்படங்களில் நடித்து முன்னணி நடிகையாக உயர்ந்தார்.
முன்னணி நடிகையாக நயன்தாரா
சிறிய அளவிலான சம்பளத்தில் தொடங்கிய நயன்தாராவின் பயணம், இன்று இந்திய சினிமாவில் அதிக கவனம் பெறும் நடிகைகளில் ஒருவராக அவரை உருவாக்கியுள்ளது. அவரது திரைப்பயணம் பல ஆண்டுகளாக தொடர்ந்து வெற்றிகரமாக நீடித்து வருகிறது.
