விளையாட்டுத் துறைக்கான புதிய அறிவிப்புகள்
தமிழ்நாடு சட்டப்பேரவையில் விளையாட்டு மேம்பாடு மற்றும் இளைஞர் நலன் தொடர்பான மானியக் கோரிக்கை மீதான விவாதம் நடைபெற்றது. இதில், விளையாட்டு வீரர்களை ஊக்குவிக்கும் வகையிலும், பாரம்பரிய விளையாட்டுகளை வளர்க்கும் நோக்கிலும் அமைச்சர் ஆதவ் அர்ஜுனா பல்வேறு அறிவிப்புகளை வெளியிட்டார்.
சிலம்பம், மல்லர் கம்பத்துக்கு முக்கியத்துவம்
தமிழகத்தின் பாரம்பரிய விளையாட்டுகள் மற்றும் தற்காப்புக் கலைகளை அடுத்த தலைமுறையினரிடம் கொண்டு செல்லும் வகையில், மாநிலம் முழுவதும் *சிலம்பம் மற்றும் மல்லர் கம்பம்* ஆகிய விளையாட்டுகளுக்கான பிரம்மாண்ட போட்டிகள் அரசு சார்பில் நடத்தப்படும் என அமைச்சர் அறிவித்தார்.
இந்த நடவடிக்கை கிராமப்புறங்களில் உள்ள திறமையான வீரர்கள் மற்றும் பாரம்பரிய விளையாட்டுகளில் ஆர்வமுள்ள இளைஞர்களுக்கு வாய்ப்புகளை அதிகரிக்கும் என எதிர்பார்க்கப்படுகிறது.
வீரர்களின் விமானப் பயணச் செலவை ஏற்கும் அரசு
தேசிய மற்றும் சர்வதேச அளவிலான முக்கிய விளையாட்டுப் போட்டிகளில் பங்கேற்கத் தேர்வாகும் தமிழக வீரர்களுக்கு ஏற்படும் பயணச் செலவைக் குறைக்கும் வகையில் புதிய அறிவிப்பு வெளியாகியுள்ளது. வெளிமாநிலங்கள் மற்றும் வெளிநாடுகளில் நடைபெறும் முக்கிய போட்டிகளில் பங்கேற்கச் செல்லும் தமிழக விளையாட்டு வீரர்களின் *விமானப் பயணக் கட்டணத்தை அரசே முழுமையாக ஏற்கும்* என அமைச்சர் தெரிவித்துள்ளார்.
ரூ.5.15 கோடியில் ‘விளையாட்டு உபகரண வங்கி
பொருளாதாரத்தில் பின்தங்கிய மற்றும் கிராமப்புறங்களைச் சேர்ந்த திறமையான வீரர்களுக்கு தேவையான விளையாட்டு உபகரணங்கள் கிடைப்பதை உறுதி செய்யும் வகையில், *ரூ.5.15 கோடி மதிப்பில் ‘விளையாட்டு உபகரண வங்கி’* உருவாக்கப்பட உள்ளது. இதன் மூலம் தேவையுள்ள வீரர்களுக்கு உயர்தர விளையாட்டு உபகரணங்கள் இலவசமாகவோ அல்லது குறைந்த கட்டணத்திலோ கிடைக்க நடவடிக்கை எடுக்கப்படும் என தெரிவிக்கப்பட்டுள்ளது.
ஏழை வீரர்களுக்கு புதிய வாய்ப்பு
விமானப் பயணச் செலவை அரசே ஏற்கும் திட்டமும், விளையாட்டு உபகரண வங்கி அமைக்கும் நடவடிக்கையும் பொருளாதார வசதி குறைந்த வீரர்களுக்கு முக்கிய உதவியாக அமையும் என எதிர்பார்க்கப்படுகிறது. இதன் மூலம் திறமை இருந்தும் பொருளாதாரத் தடைகளால் வாய்ப்புகளை இழக்கும் வீரர்களுக்கு தேசிய மற்றும் சர்வதேச போட்டிகளில் பங்கேற்கும் வாய்ப்பு மேலும் அதிகரிக்கும்.
