தலையணையில் மஞ்சள் கறை, துர்நாற்றமா? வீட்டிலேயே சுத்தம் செய்யும் எளிய வழி!!

தினமும் பயன்படுத்தும் தலையணைகளில் வியர்வை, உடல் எண்ணெய், உமிழ்நீர் மற்றும் தூசி போன்றவை படிவது இயல்பானது. தலையணை உறையை மட்டும் அடிக்கடி துவைத்தாலும், உள்ளே இருக்கும் தலையணையில் இந்த அழுக்குகள் சேர்ந்து நாளடைவில் மஞ்சள் நிறக் கறைகளையும் துர்நாற்றத்தையும் ஏற்படுத்தலாம்.

எனவே தலையணைகளையும் அவ்வப்போது சுத்தம் செய்வது அவசியம். குறிப்பாக தண்ணீரில் கழுவக்கூடிய தலையணைகளை சில மாதங்களுக்கு ஒருமுறை சுத்தம் செய்வது நல்லது. கையால் சுத்தம் செய்வதன் மூலம் தலையணையின் வடிவத்தையும் மென்மையையும் பாதுகாக்க முடியும்.

சுத்தம் செய்ய தேவையான பொருட்கள்

ஒரு பெரிய வாளி

வெதுவெதுப்பான தண்ணீர்

2 டீஸ்பூன் மைல்டு லிக்விட் டிடர்ஜென்ட்

பேக்கிங் சோடா

வெள்ளை வினிகர்

மென்மையான ஸ்பாஞ்ச்

சுத்தமான உலர் துண்டு

முதலில் கவனிக்க வேண்டியது

தலையணையை சுத்தம் செய்வதற்கு முன்பு அதன் உறை மற்றும் பில்லோ புரொடெக்டரை அகற்றி தனியாக துவைக்க வேண்டும். அதேபோல், தலையணையில் இருக்கும் Care Label-ஐ பார்த்து, அதை தண்ணீரில் கழுவுவதற்கு அனுமதி உள்ளதா என்பதை உறுதி செய்யுங்கள்.

முக்கிய குறிப்பு: Memory Foam மற்றும் Latex வகை தலையணைகளை தண்ணீரில் முழுமையாக நனைத்து துவைக்கக் கூடாது. அவற்றுக்கு உற்பத்தியாளர் குறிப்பிடும் சுத்தம் செய்யும் முறையையே பின்பற்ற வேண்டும்.

தலையணையை கையால் சுத்தம் செய்வது எப்படி?

1. சுத்தம் செய்யும் நீரை தயாரிக்கவும்

ஒரு பெரிய வாளியில் வெதுவெதுப்பான தண்ணீரை எடுத்துக்கொள்ளுங்கள். அதில் மைல்டு லிக்விட் டிடர்ஜென்ட் மற்றும் சிறிதளவு பேக்கிங் சோடா சேர்த்து நன்றாகக் கலக்கவும்.

2. தலையணையை ஊற வைக்கவும்

தலையணையை அந்தக் கலவையில் முழுமையாக மூழ்க வைத்து, சோப்பு நீர் உள்ளே செல்லும் வகையில் மெதுவாக அழுத்தவும். சுமார் 20 முதல் 30 நிமிடங்கள் ஊறவிடலாம்.

தலையணையை முறுக்கிப் பிழிவதைத் தவிர்க்க வேண்டும். அவ்வாறு செய்தால் அதன் உள்ளே இருக்கும் நார் அல்லது ஃபில்லிங் பாதிக்கப்பட்டு வடிவம் மாறக்கூடும்.

3. சுத்தமான தண்ணீரில் அலசவும்

அழுக்கு நீரை வெளியேற்றிவிட்டு, புதிய வெதுவெதுப்பான தண்ணீரை பயன்படுத்தி தலையணையை நன்றாக அலசவும். சோப்பு முழுமையாக வெளியேறும் வரை தண்ணீரை மாற்றி அலசுவது நல்லது. கடைசி முறை அலசும்போது தண்ணீரில் சிறிதளவு *வெள்ளை வினிகர்* சேர்ப்பது தலையணையில் இருக்கும் துர்நாற்றத்தை குறைக்க உதவும்.

 4. தண்ணீரை மெதுவாக அகற்றவும்

தலையணையை முறுக்கி அல்லது பலமாகப் பிழியக்கூடாது. அதற்கு பதிலாக இரண்டு கைகளாலும் மெதுவாக அழுத்தி அதிகப்படியான தண்ணீரை வெளியேற்றுங்கள்.

பின்னர் ஒரு சுத்தமான உலர் துண்டில் தலையணையைச் சுற்றி, துண்டு ஈரத்தை உறிஞ்சும் வகையில் மெதுவாக அழுத்தலாம்.

5. முழுமையாக காய வைக்கவும்

துவைத்த தலையணையை நல்ல சூரிய ஒளி அல்லது காற்றோட்டம் கிடைக்கும் இடத்தில் வைத்து உலர்த்த வேண்டும். இரண்டு பக்கங்களும் சமமாக காயும் வகையில் அவ்வப்போது தலையணையைத் திருப்பிப் போடுங்கள்.

தலையணையின் உள்ளே ஈரப்பதம் இருக்கும்போதே பயன்படுத்த வேண்டாம் முழுமையாக உலர்ந்த பிறகே மீண்டும் பயன்படுத்த வேண்டும்.

தலையணையை எவ்வளவு அடிக்கடி சுத்தம் செய்ய வேண்டும்?

தலையணை உறைகளை வாரத்திற்கு ஒருமுறை துவைப்பது நல்லது. தலையணைகளை அவ்வப்போது காற்றிலும் வெயிலிலும் உலர்த்தலாம். தண்ணீரில் துவைக்கக்கூடிய தலையணைகளை பொதுவாக 3 முதல் 6 மாதங்களுக்கு ஒருமுறை சுத்தம் செய்வது நல்ல பழக்கமாகும்.

தலையணையில் மஞ்சள் கறை அல்லது துர்நாற்றம் ஏற்பட்ட பிறகு மட்டும் சுத்தம் செய்வதைவிட, தொடர்ந்து பராமரிப்பது அதன் சுத்தத்தையும் பயன்பாட்டு காலத்தையும் மேம்படுத்த உதவும்.