இந்தியாவில் ரயில் பயணத்திற்கான முன்பதிவு தொடர்ந்து அதிகரித்து வரும் நிலையில், IRCTC ஆன்லைன் டிக்கெட் முன்பதிவில் புதிய சாதனையை படைத்துள்ளது.
ஒரே நாளில் 20 லட்சம் டிக்கெட்டுகள்
செப்டம்பர் 7-ஆம் தேதி ஒரே நாளில் 20,06,353 ரயில் டிக்கெட்டுகள் ஆன்லைன் மூலம் முன்பதிவு செய்யப்பட்டுள்ளன. IRCTC தொடங்கிய காலத்திலிருந்து பதிவான அதிகபட்ச ஒரு நாள் ஆன்லைன் முன்பதிவு இதுவாகும்.
அடுத்த நாளான செப்டம்பர் 8-ஆம் தேதியும் சுமார் 19.5 லட்சம் டிக்கெட்டுகள் முன்பதிவு செய்யப்பட்டுள்ளன. இதன் மூலம் தொடர்ந்து இரு நாட்களிலும் மிகப்பெரிய அளவில் டிக்கெட் முன்பதிவு நடைபெற்றுள்ளது.
பண்டிகை கால பயணத்தால் அதிகரித்த முன்பதிவு
வரும் பண்டிகை காலத்தை முன்னிட்டு ரயில் பயணிகளின் எண்ணிக்கை அதிகரித்துள்ளதே இந்த முன்பதிவு சாதனைக்கு முக்கிய காரணமாக பார்க்கப்படுகிறது. முன்கூட்டிய முன்பதிவு தொடங்கியதும், பயணிகள் அதிக அளவில் ஆன்லைன் மூலம் டிக்கெட்டுகளை பதிவு செய்துள்ளனர்.
இந்திய ரயில்வேயின் மொத்த டிக்கெட் முன்பதிவுகளில் ஆன்லைன் முன்பதிவின் பங்கு தற்போது சுமார் 89 சதவீதமாக இருப்பதாக தெரிவிக்கப்பட்டுள்ளது.
டிக்கெட் புக்கிங் வசதியை மேம்படுத்திய IRCTC
பண்டிகை காலங்களில் குறிப்பாக முன்பதிவு தொடங்கும் முதல் சில நிமிடங்களில் அதிகப்படியான பயணிகள் ஒரே நேரத்தில் இணையதளம் மற்றும் செயலியை பயன்படுத்துகின்றனர். இதனால் ஏற்படும் அதிகப்படியான டிராஃபிக்கை சமாளிக்க IRCTC தனது டிக்கெட் முன்பதிவு அமைப்பின் திறனை மேம்படுத்தியுள்ளது.
அதிக எண்ணிக்கையிலான பயணிகள் ஒரே நேரத்தில் டிக்கெட் முன்பதிவு செய்யும் சூழலிலும் சேவை தடையின்றி இயங்கும் வகையில், அமைப்பின் திறன் இரட்டிப்பாக்கப்பட்டுள்ளதாக தெரிவிக்கப்பட்டுள்ளது.
பண்டிகை காலம் நெருங்கும் நிலையில், ரயில் டிக்கெட் முன்பதிவில் மேலும் அதிகமானோர் இணைய வாய்ப்புள்ளதால், இந்த முறை ரயில்வேயின் டிஜிட்டல் முன்பதிவு அமைப்புக்கு முக்கியமான காலகட்டமாக அமைந்துள்ளது.
