கிரிப்டோகரன்சி ஏடிஎம் (Crypto Kiosk) மையங்களைப் பயன்படுத்தி, அப்பாவி மக்களின் வாழ்நாள் சேமிப்புப் பணத்தை ஏமாற்றும் புதிய வகை சைபர் மோசடி குறித்து அதிகாரிகள் எச்சரிக்கை விடுத்துள்ளனர்.

அண்மைக் காலமாக அமெரிக்காவின் மிசோரி (Missouri) மாநிலத்தில் உள்ள ‘லேக் செயிண்ட் லூயிஸ்’ (Lake Saint Louis) உள்ளிட்ட பல பகுதிகளில் கிரிப்டோகரன்சி ஏடிஎம் மையங்கள் மூலமாக நடைபெறும் பண மோசடிகள் கணிசமாக அதிகரித்துள்ளன.

சமீபத்தில் செய்தியாளர்களிடம் பேசிய லேக் செயிண்ட் லூயிஸ் காவல் துறை அதிகாரி கிறிஸ் டிஜியூசெப்பி (Chris DiGiuseppi), “பலரும் தங்களின் ஆயுட்கால சேமிப்புப் பணம் முழுவதையும் இந்த மோசடியில் இழந்து வருகின்றனர். சிலர் தங்களது எதிர்கால முதலீடுகளைக்கூட அவசர அவசரமாகப் பணமாக மாற்றி, ஏமாற்றுபவர்களிடம் ஒப்படைத்துள்ளனர்” என்று வேதனையுடன் தெரிவித்துள்ளார்.

இந்த மோசடி கும்பல் மிகவும் திட்டமிட்டு செயல்படுகிறது:

1. போலி முகவரி: சைபர் குற்றவாளிகள் காவல்துறை அதிகாரிகள் போலவோ, அரசு வர்த்தக அமைப்புகளின் (FTC) பிரதிநிதிகள் போலவோ அல்லது மைக்ரோசாப்ட் (Microsoft) போன்ற முன்னணி தொழில் நுட்ப நிறுவனங்களின் ஊழியர்கள் போலவோ தங்களை அறிமுகப்படுத்திக் கொள்கிறார்கள்.

2. பயமுறுத்தல்: “உங்கள் மீது கைது வாரண்ட் உள்ளது” என்றோ அல்லது “உங்கள் கணக்கில் சட்டவிரோதப் பணப் பரிவர்த்தனை நடந்துள்ளது” என்றோ கூறி மக்களை போனில் அழைத்து அச்சுறுத்துகிறார்கள்.

3. ஏடிஎம் நோக்கி வழிகாட்டுதல்: பாதிக்கப்பட்ட நபரைத் தொடர்ந்து போன் அழைப்பிலேயே வைத்திருந்து, வங்கியில் இருந்து பணத்தை எடுக்க வைத்து, அருகில் உள்ள கிரிப்டோகரன்சி ஏடிஎம் (Crypto Kiosk / Bitcoin ATM) மையத்திற்கு அழைத்துச் சென்று பணத்தை டெபாசிட் செய்ய வைக்கின்றனர்.

முதியவர்கள் மட்டுமல்ல… இளைஞர்களும் பலி!

காவல்துறை ஆய்வின்படி, இந்த மோசடியில் 85% பாதிக்கப்பட்டவர்கள் 60 வயதிற்கு மேற்பட்ட முதியவர்கள் எனத் தெரியவந்துள்ளது. இருப்பினும், 33, 35 மற்றும் 44 வயதுடைய இளம் தலைமுறையினரும் இந்த மோசடி வலையில் சிக்கிப் பணத்தை இழந்துள்ளதாகக் காவல்துறையினர் தெரிவிக்கின்றனர்.

அமெரிக்கா முழுவதிலும் இந்த வகை கிரிப்டோ ஏடிஎம் மோசடிகளால் இதுவரை $300 மில்லியனுக்கும் அதிகமான பணம் (இந்திய மதிப்பில் சுமார் ₹2,500 கோடிக்கும் மேல்) கொள்ளை யடிக்கப்பட்டுள்ளதாக புள்ளி விவரங்கள் தெரிவிக்கின்றன.

மோசடியில் இருந்து தப்பிப்பது எப்படி? – காவல்துறை வழங்கும் விழிப்புணர்வு டிப்ஸ்!

• கைது வாரண்ட் போனில் வராது: எந்தவொரு காவல்துறையோ அல்லது அரசு அதிகாரியோ தொலைபேசியில் அழைத்து, “கைது செய்யாமல் இருக்கப் பணம் கட்டுங்கள்” என்று கூறமாட்டார்கள்.

• பயப்படாதீர்கள்: சட்டம் சார்ந்த அச்சுறுத்தல்கள் போனில் வரும்போது பதற்றமடையாமல், உடனடியாக உங்கள் உள்ளூர் காவல் நிலையத்தைத் தொடர்பு கொள்ளவும்.

• ரகசியத்தை பகிராதீர்கள்: பிட்காயின் அல்லது கிரிப்டோ ஏடிஎம்-களில் அடையாளம் தெரியாத நபர்களின் கியூஆர் கோடு (QR Code) அல்லது கணக்குகளுக்குப் பணத்தை செலுத்த வேண்டாம்.

• வெட்கப்படாமல் புகாரளிக்கவும்: ஒருவேளை நீங்கள் ஏமாற நேரிட்டால், அவமானப்படாமல் உடனடியாகக் காவல்துறையில் புகார் அளிப்பது மற்றவர்களையும் காப்பாற்ற உதவும்.