South Asian Games: 2027 தெற்காசிய விளையாட்டுப் போட்டிகள் பாகிஸ்தானில் நடைபெற உள்ள நிலையில், இதில் இந்திய வீரர்கள் பங்கேற்க உள்ளதாக தகவல் வெளியாகியுள்ளது. பாகிஸ்தான் ஒலிம்பிக் சங்கத்தின் தகவலின்படி, போட்டியில் பங்கேற்க இந்தியா கொள்கை அளவில் ஒப்புதல் தெரிவித்துள்ளது.
ஏப்ரல் 2027-ல் போட்டிகள்
14-வது தெற்காசிய விளையாட்டுப் போட்டிகள் 2027 ஏப்ரல் 4 முதல் 11-ம் தேதி வரை பாகிஸ்தானில் நடைபெற திட்டமிடப்பட்டுள்ளது. இஸ்லாமாபாத், லாகூர் மற்றும் பெஷாவர் ஆகிய நகரங்களில் போட்டிகள் நடத்தப்பட உள்ளன. மொத்தம் 28 விளையாட்டுகள் இடம்பெற உள்ளன.
இந்திய வீரர்களின் பங்கேற்பு
பாகிஸ்தான் ஒலிம்பிக் சங்க பொதுச்செயலாளர் காலித் மெஹ்மூத் கூறுகையில், தெற்காசிய ஒலிம்பிக் கவுன்சில் அளவிலான கூட்டத்தில் இந்தியா போட்டியில் பங்கேற்பதற்கான தனது சம்மதத்தை தெரிவித்ததாக கூறப்பட்டுள்ளது. இந்திய அணியின் முழுமையான விவரங்கள் 2027 ஜனவரியில் வழங்கப்படும் என எதிர்பார்க்கப்படுகிறது என்றார்.
இருப்பினும், இந்திய வீரர்கள் பாகிஸ்தான் செல்வதற்கான இறுதி அனுமதி இந்திய அரசு அல்லது இந்திய ஒலிம்பிக் சங்கத்தால் தனியாக அதிகாரப்பூர்வமாக அறிவிக்கப்படவில்லை. எனவே, தற்போதைய தகவல் கொள்கை அளவிலான ஒப்புதல் என்ற நிலையிலேயே உள்ளது.
23 ஆண்டுகளுக்குப் பிறகு பாகிஸ்தான்
பாகிஸ்தான் கடைசியாக 2004-ம் ஆண்டு இஸ்லாமாபாத்தில் தெற்காசிய விளையாட்டுப் போட்டிகளை நடத்தியது. 2027 போட்டிகள் நடைபெறும் பட்சத்தில், சுமார் 23 ஆண்டுகளுக்குப் பிறகு அந்த நாடு மீண்டும் இந்தப் போட்டிகளை நடத்த உள்ளது.
28 விளையாட்டுகளில் போட்டி
தடகளம், வில்வித்தை, பேட்மிண்டன், குத்துச்சண்டை, கிரிக்கெட், கால்பந்து, ஹாக்கி, கபடி, துப்பாக்கிச் சுடுதல், நீச்சல், டென்னிஸ், மல்யுத்தம், பளுதூக்குதல் உள்ளிட்ட பல்வேறு விளையாட்டுகள் போட்டியில் இடம்பெற உள்ளன. சுமார் 3,200 வீரர்கள் பங்கேற்கலாம் என முந்தைய திட்டங்களில் தெரிவிக்கப்பட்டிருந்த நிலையில், பாகிஸ்தான் தரப்பில் 6,000-க்கும் மேற்பட்ட வீரர்கள் மற்றும் அதிகாரிகள் வரலாம் என எதிர்பார்க்கப்படுகிறது.
