பாதாம் பல்வேறு ஊட்டச்சத்துக்கள் நிறைந்த ஒரு பருப்பு வகையாகும். தற்போது பசும்பாலுக்கு மாற்றாக பாதாம் பால் (Almond Milk) பரவலாகப் பயன்படுத்தப்படுகிறது. ஆனால், முழு பாதாமை சாப்பிடுவதற்கும் பாதாம் பால் குடிப்பதற்கும் ஊட்டச்சத்து அடிப்படையில் வித்தியாசம் உள்ளது.
முழு பாதாமின் நன்மைகள்
முழு பாதாமில் புரதம், நல்ல கொழுப்புகள், நார்ச்சத்து, வைட்டமின் E, மெக்னீசியம், மாங்கனீஸ் உள்ளிட்ட பல ஊட்டச்சத்துக்கள் உள்ளன. சுமார் கால் கப் முழு பாதாமில் 7.6 கிராம் புரதம், 17.7 கிராம் கொழுப்பு மற்றும் 4.5 கிராம் நார்ச்சத்து உள்ளது. பாதாமில் உள்ள நார்ச்சத்து மற்றும் நல்ல கொழுப்புகள் நீண்ட நேரம் வயிறு நிறைந்த உணர்வை ஏற்படுத்த உதவுவதால், அளவோடு சாப்பிடும்போது ஆரோக்கியமான சிற்றுண்டியாக இருக்கலாம்.
பாதாம் பாலில் என்ன இருக்கிறது?
பாதாமை தண்ணீருடன் அரைத்து வடிகட்டுவதன் மூலம் பொதுவாக பாதாம் பால் தயாரிக்கப்படுகிறது. இந்த செயல்முறையில் பாதாமின் திடப்பகுதி நீக்கப்படுவதால், முழு பாதாமுடன் ஒப்பிடும்போது புரதம் மற்றும் நார்ச்சத்து குறைவாகவே இருக்கும். பாரம்பரிய பாதாம் பாலில் ஒரு கப் அளவுக்கு சுமார் 1 கிராம் புரதம் மட்டுமே இருக்கலாம்.
அதே நேரத்தில், பல வணிகரீதியான பாதாம் பால்களில் கால்சியம் மற்றும் வைட்டமின் D போன்ற ஊட்டச்சத்துக்கள் சேர்க்கப்படுகின்றன. எனவே வாங்கும்போது அதன் ஊட்டச்சத்து அட்டவணையைப் பார்ப்பது அவசியம்.
எதை தேர்வு செய்வது?
முழு பாதாம் சாப்பிடுவதன் மூலம் புரதம், நார்ச்சத்து மற்றும் நல்ல கொழுப்புகள் உள்ளிட்ட பாதாமின் இயற்கையான ஊட்டச்சத்துக்களை அதிகமாகப் பெற முடியும்.
மறுபுறம், குறைந்த கலோரி கொண்ட பானத்தை விரும்புபவர்கள் அல்லது பால் பொருட்களைத் தவிர்ப்பவர்கள் சர்க்கரை சேர்க்கப்படாத பாதாம் பாலை தேர்வு செய்யலாம். பாதாம் பாலில் சேர்க்கப்படும் சர்க்கரையின் அளவை கவனிப்பதும் முக்கியம்.
பாதாமின் முழுமையான ஊட்டச்சத்து நன்மைகளைப் பெற வேண்டும் என்றால் முழு பாதாம் சிறந்த தேர்வு. பால் மாற்றாக குறைந்த கலோரி பானம் தேவைப்பட்டால், unsweetened almond milk ஒரு சிறந்த தேர்வு.
