முன்னாள் அமைச்சரும், ஈரோடு மாவட்டத்தைச் சேர்ந்த அரசியல் பிரமுகருமான தோப்பு வெங்கடாச்சலம் (Thoppu Venkatachalam) திமுகவில் இருந்து விலகுவதாக அறிவித்துள்ளார். மேலும், தற்போதைக்கு வேறு எந்த அரசியல் கட்சியிலும் இணையப் போவதில்லை என்றும் அவர் தெரிவித்துள்ளார். அவரது இந்த முடிவு தமிழக அரசியல் வட்டாரத்தில் கவனம் பெற்றுள்ளது.
திமுகவில் இணைந்த தோப்பு வெங்கடாச்சலம்
தேர்தலுக்கு முன்பு அதிமுகவில் இருந்து விலகிய தோப்பு வெங்கடாச்சலம் திமுகவில் இணைந்தார். அவருக்கு ஈரோடு மத்திய மாவட்ட திமுக பொறுப்பாளர் பதவி வழங்கப்பட்டது. பின்னர் 2026 சட்டப்பேரவைத் தேர்தலில் பெருந்துறை தொகுதியில் திமுக சார்பில் போட்டியிட்டார்.
மாவட்ட பொறுப்பில் இருந்து நீக்கம்
தேர்தல் முடிவுகளுக்குப் பிறகு, தோப்பு வெங்கடாச்சலத்தை ஈரோடு மத்திய மாவட்ட பொறுப்பாளர் பதவியில் இருந்து விடுவிப்பதாக திமுக பொதுச்செயலாளர் துரைமுருகன் அறிவித்தார். இதுகுறித்து பேசிய தோப்பு வெங்கடாச்சலம், தனது பதவி நீக்கத்திற்கான காரணத்தை கட்சி தலைமைதான் தெரிவிக்க வேண்டும் என்று கூறியிருந்தார்.
தேர்தல் தோல்வி குறித்து கருத்து
2026 சட்டப்பேரவைத் தேர்தலில் திமுக ஆட்சியை இழந்ததற்கு விஜய் அலை மட்டுமே காரணமல்ல என்றும் அவர் தெரிவித்திருந்தார். ஈரோடு மாவட்டத்தில் கட்சிக்குள் நடைபெற்ற சில உள்ளடி வேலைகளால் பல தொகுதிகளில் வெற்றி வாய்ப்பு தவறியதாகவும் அவர் கூறியிருந்தார்.
இந்த நிலையில், தற்போது திமுகவில் இருந்தும் விலகுவதாக தோப்பு வெங்கடாச்சலம் அறிவித்துள்ளார்.
