திராவிட முன்னேற்றக் கழகம் 78-வது ஆண்டில் அடியெடுத்து வைத்துள்ள நிலையில், கட்சியின் பயணம் மற்றும் கொள்கைகள் குறித்து துணை பொதுச்செயலாளர் கனிமொழி மற்றும் இளைஞரணி செயலாளர் உதயநிதி ஸ்டாலின் ஆகியோர் சமூக வலைதளங்களில் பதிவிட்டுள்ளனர்.
பாமரர்களிடம் அரசியலை கொண்டு சேர்த்த திமுக – உதயநிதி
உதயநிதி ஸ்டாலின் வெளியிட்ட பதிவில், ஜமீன்கள் மற்றும் பண்ணைகளில் மட்டுமே நிலவி வந்த அரசியலை பாமர மக்களின் கரங்களுக்கு கொண்டு சேர்த்த இயக்கமாக திமுக உருவானதாக குறிப்பிட்டுள்ளார்.
அண்ணா, கலைஞர் உள்ளிட்ட தலைவர்கள் மற்றும் தொண்டர்களின் முயற்சியால் உருவான திமுக தற்போது 78-வது ஆண்டில் அடியெடுத்து வைத்துள்ளதாக அவர் தெரிவித்துள்ளார்.
மேலும், ஆட்சியில் இருந்தாலும் இல்லாவிட்டாலும் கடந்த 78 ஆண்டுகளில் தமிழ்ச் சமூகத்தின் முன்னேற்றத்திற்கு கட்சி பல்வேறு பணிகளை மேற்கொண்டுள்ளதாகவும், சமூக நீதி, மாநில உரிமை, பெண் விடுதலை, தொழில் வளர்ச்சி உள்ளிட்ட கொள்கைகளை அடிப்படையாகக் கொண்டு செயல்பட்டு வருவதாகவும் உதயநிதி குறிப்பிட்டுள்ளார்.
தமிழ்நாடு என்ற பெயர் சூட்டப்பட்டது முதல் மாநிலத்தின் வளர்ச்சிக்காக மேற்கொள்ளப்பட்ட பணிகள் வரை திமுகவின் பங்களிப்பு இருப்பதாகவும் அவர் தனது பதிவில் தெரிவித்துள்ளார்.
வெற்றியும் தோல்வியும் புதிதல்ல – கனிமொழி
கனிமொழி தனது பதிவில், தமிழினத்தின் உரிமைக் குரலாக திமுக உருவானதாக குறிப்பிட்டுள்ளார்.
கட்சியின் 78 ஆண்டுகால பயணத்தில் வெற்றிகளையும் தோல்விகளையும் சந்தித்துள்ளதாகவும், ஆட்சி என்பது மாறக்கூடியது என்றாலும் கட்சியின் கொள்கைகள் தொடர்ந்து நிலைத்திருக்கும் என்ற முன்னாள் முதல்-அமைச்சர் கருணாநிதியின் கருத்தை மேற்கோள் காட்டியும் அவர் தெரிவித்துள்ளார்.
கலைஞரின் கொள்கைகளை மனதில் கொண்டு, தொடர்ந்து கொள்கைப் பாதையில் முன்னேறிச் செல்வோம் என்றும் கனிமொழி தனது பதிவில் கூறியுள்ளார்.
திமுக 78-வது ஆண்டில் அடியெடுத்து வைத்துள்ள நிலையில், அக்கட்சியின் முக்கிய தலைவர்கள் வெளியிட்டுள்ள இந்த கருத்துகள் அரசியல் வட்டாரத்தில் கவனம் பெற்றுள்ளன.
