நவம்பர் 22-ல் காஞ்சிபுரம் குமரக்கோட்டம் முருகன் கோயில் குடமுழுக்கு! 18 ஆண்டுகளுக்குப் பிறகு விழா
காஞ்சிபுரத்தில் புகழ்பெற்ற குமரக்கோட்டம் சுப்பிரமணிய சுவாமி கோயிலில் 18 ஆண்டுகளுக்குப் பிறகு நவம்பர் 22-ஆம் தேதி குடமுழுக்கு விழா நடைபெற உள்ளது. இதற்கான பந்தக்கால் நடும் நிகழ்ச்சி இன்று நடைபெற்றது.
18 ஆண்டுகளுக்குப் பிறகு குடமுழுக்கு விழா!
காஞ்சிபுரம் மாநகராட்சிக்கு உட்பட்ட மேற்கு ராஜ வீதியில் புகழ்பெற்ற அருள்மிகு குமரக்கோட்டம் சுப்பிரமணிய சுவாமி திருக்கோயில் அமைந்துள்ளது.
கந்தபுராணம் அரங்கேற்றம் செய்யப்பட்ட சிறப்புமிக்க இந்தத் திருக்கோயிலில் கடந்த 18 ஆண்டுகளாக குடமுழுக்கு விழா நடைபெறவில்லை.
இந்நிலையில், கோயிலில் புனரமைப்புப் பணிகள் நிறைவடைந்ததைத் தொடர்ந்து, வரும் நவம்பர் 22-ஆம் தேதி குடமுழுக்கு விழா நடத்தத் திட்டமிடப்பட்டுள்ளது.
ரூ.66.48 லட்சத்தில் 16 வகையான திருப்பணிகள்!
குமரக்கோட்டம் முருகன் கோயிலில் திருப்பணிகளை மேற்கொள்வதற்காக கடந்த 2024-ஆம் ஆண்டு பிப்ரவரி 26-ஆம் தேதி பாலாலயம் நடைபெற்றது.
இதனைத் தொடர்ந்து, ரூ.66.48 லட்சம் மதிப்பீட்டில் 16 வகையான சீரமைப்புப் பணிகள் மேற்கொள்ளப்பட்டன.
பணிகள் நிறைவடைந்த நிலையில், குடமுழுக்கு விழாவுக்கான ஏற்பாடுகள் தீவிரமாக நடைபெற்று வருகின்றன.
குடமுழுக்கு விழாவுக்குப் பந்தக்கால் நடும் நிகழ்ச்சி!
குடமுழுக்கு விழாவை முன்னிட்டு நவம்பர் 1-ஆம் தேதியான இன்று கோயிலில் பந்தக்கால் நடும் நிகழ்ச்சி நடைபெற்றது.
இதில் கோயில் செயல் அலுவலர் மற்றும் குடமுழுக்கு விழா கமிட்டி உறுப்பினர்கள் ராதாகிருஷ்ணன், முருகேசன், துரைப்பாசையப்பன் உள்ளிட்டோர் கலந்து கொண்டனர்.
மேலும், ஏராளமான பக்தர்கள் பங்கேற்று பந்தக்கால் நடும் நிகழ்ச்சியில் கலந்து கொண்டனர்.
நவம்பர் 22-ஆம் தேதி நடைபெறவுள்ள குடமுழுக்கு விழாவைக் காண காஞ்சிபுரம் மற்றும் சுற்றுவட்டாரப் பகுதிகளைச் சேர்ந்த பக்தர்கள் ஆவலுடன் காத்திருக்கின்றனர்.
