அமெரிக்காவின் புளோரிடா மாகாணத்தில் குடியிருப்புப் பகுதியில் தனியார் ஜெட் விமானம் விழுந்து நொறுங்கிய விபத்தில், அதில் பயணித்த 9 பேரும் உயிரிழந்தனர்.
அமெரிக்காவின் புளோரிடா மாகாணம், பாம் பீச் கவுன்டி பகுதியில் ஞாயிற்றுக்கிழமை (நவம்பர் 1) இந்த விபத்து நிகழ்ந்தது. டெக்சாஸ் மாகாணத்தின் ஆஸ்டின் நகரில் இருந்து பஹாமாஸ் தீவுகளுக்குச் சென்றுகொண்டிருந்த லியர்ஜெட் 60 (Learjet 60) ரக தனியார் விமானம், பிற்பகல் சுமார் 12.50 மணியளவில் குடியிருப்புப் பகுதியை ஒட்டிய சாலையில் விழுந்து நொறுங்கியது.
இந்த விபத்தில் விமானத்தில் இருந்த 9 பேரும் உயிரிழந்ததாக அமெரிக்க போக்குவரத்துத் துறை அதிகாரிகள் தெரிவித்துள்ளனர். விமானம் தரையில் மோதியதும் தீப்பற்றி எரிந்ததாகவும், சம்பவ இடத்தில் பெரும் பள்ளம் ஏற்பட்டதாகவும் தகவல்கள் தெரிவிக்கின்றன.
விபத்து நிகழ்ந்த பகுதியைச் சுற்றியுள்ள குடியிருப்புகளில் வசித்த சுமார் 600 பேர் பாதுகாப்பு கருதி வெளியேற்றப்பட்டு, தற்காலிக முகாம்களுக்கு அழைத்துச் செல்லப்பட்டனர். தரையில் இருந்த பொதுமக்களுக்கு உயிரிழப்பு ஏற்பட்டதா என்பது குறித்து உடனடி உறுதியான தகவல் வெளியாகவில்லை.
விமானம் விபத்துக்குள்ளாவதற்கு முன்பு, பனிப்படர்வு மற்றும் மிதமான காற்றுக் கொந்தளிப்பு இருப்பதாக விமானி விமானப் போக்குவரத்துக் கட்டுப்பாட்டு மையத்துக்குத் தகவல் தெரிவித்ததாகக் கூறப்படுகிறது. பின்னர் விமானம் அவசரநிலையை அறிவித்த நிலையில், சில நொடிகளில் கட்டுப்பாட்டை இழந்து வேகமாகத் தரையை நோக்கி இறங்கியதாக விமானப் போக்குவரத்து உரையாடல் பதிவுகள் தெரிவிக்கின்றன.
இந்த விபத்துக்கான காரணம் குறித்து அமெரிக்காவின் தேசிய போக்குவரத்து பாதுகாப்பு வாரியம் (NTSB) விசாரணையைத் தொடங்கியுள்ளது. அமெரிக்காவின் பெடரல் விமானப் போக்குவரத்து நிர்வாகமும் (FAA) விசாரணைக்கு உதவி வருகிறது.
விமான விபத்தில் 9 பேர் உயிரிழந்த சம்பவம் அமெரிக்காவில் பெரும் சோகத்தை ஏற்படுத்தியுள்ளது.
