மதுரை சமயநல்லூரில் பிரபல ரவுடி ‘குட்டி சாக்கு’ என்றழைக்கப்படும் சூர்யா மர்ம கும்பலால் வெட்டிப் படுகொலை செய்யப்பட்ட சம்பவம் அப்பகுதியில் பரபரப்பை ஏற்படுத்தியுள்ளது.
பழைய ஊராட்சி அலுவலகத்தில் கொலை
மதுரை மாவட்டம் சமயநல்லூரைச் சேர்ந்தவர் சூர்யா. இவர் ‘குட்டி சாக்கு’ என்ற பெயரால் அழைக்கப்பட்டு வந்தார். இவர் மீது கொலை, அடிதடி உள்ளிட்ட 10-க்கும் மேற்பட்ட வழக்குகள் நிலுவையில் இருப்பதாகக் கூறப்படுகிறது.
இந்நிலையில், மதுரை – திண்டுக்கல் தேசிய நெடுஞ்சாலையில் உள்ள பழைய ஊராட்சி மன்ற அலுவலகக் கட்டடத்தில் சூர்யா மது அருந்திக் கொண்டிருந்தார். அப்போது அங்கு வந்த மர்ம கும்பல் அவரைச் சரமாரியாக வெட்டித் தாக்கிவிட்டு தப்பியோடியது.
இந்தத் தாக்குதலில் பலத்த காயமடைந்த சூர்யா சம்பவ இடத்திலேயே உயிரிழந்தார்.
உடலைக் கைப்பற்றி போலீஸார் விசாரணை
இதுகுறித்து தகவல் அறிந்த சமயநல்லூர் காவல்துறையினர் சம்பவ இடத்துக்கு விரைந்து சென்று விசாரணை நடத்தினர். பின்னர் சூர்யாவின் உடலைக் கைப்பற்றி உடற்கூறாய்வுக்காக மதுரை அரசு ராஜாஜி மருத்துவமனைக்கு அனுப்பி வைத்தனர்.
முன்விரோதம் காரணமா?
சூர்யா மீது ஏற்கெனவே பல்வேறு குற்ற வழக்குகள் நிலுவையில் இருப்பதால், பழைய முன்விரோதம் காரணமாக இந்தக் கொலை நடந்திருக்கலாம் என போலீஸார் சந்தேகிக்கின்றனர்.
இதையடுத்து கொலையில் தொடர்புடைய மர்ம நபர்களைக் கண்டறிய காவல்துறையினர் விசாரணையைத் தீவிரப்படுத்தியுள்ளனர். குற்றவாளிகளைப் பிடிக்கத் தேவையான நடவடிக்கைகள் மேற்கொள்ளப்பட்டு வருகின்றன.
மதுரை சமயநல்லூரில் நடந்த இந்தக் கொலைச் சம்பவம் அப்பகுதி மக்களிடையே அதிர்ச்சியை ஏற்படுத்தியுள்ளது.
