48 ஆண்டுகளாகத் தண்ணீரே குடிக்காத கோடீஸ்வரர்! தினமும் 5 கேன் கோக் குடிக்கும் வாரன் பஃபெட்

96 வயதிலும் உலகப் புகழ்பெற்ற முதலீட்டாளரின் வித்தியாசமான உணவுப் பழக்கம் – பில் ஆக்மேன் வெளியிட்ட ஆச்சரியத் தகவல்!

உலகின் முன்னணி முதலீட்டாளர்களில் ஒருவரான அமெரிக்காவைச் சேர்ந்த வாரன் பஃபெட், கடந்த 48 ஆண்டுகளாகத் தண்ணீர் குடிப்பதில்லை என்று கூறியிருப்பது ஆச்சரியத்தை ஏற்படுத்தியுள்ளது. தண்ணீருக்குப் பதிலாக தனக்குப் பிடித்தமான செர்ரி கோக் பானத்தையே அவர் விரும்பிக் குடித்து வருவதாகத் தகவல் வெளியாகியுள்ளது.

பில் ஆக்மேன் வெளியிட்ட தகவல்

பிரபல முதலீட்டாளரும் தொழிலதிபருமான பில் ஆக்மேன் சமீபத்திய பேட்டி ஒன்றில் வாரன் பஃபெட்டின் இந்த வித்தியாசமான பழக்கத்தைப் பகிர்ந்துள்ளார்.

ஒருமுறை இரவு விருந்தின்போது வாரன் பஃபெட்டுக்கு ஆக்மேன் தண்ணீர் வழங்கியுள்ளார். ஆனால், அவர் அதை ஏற்க மறுத்துள்ளார். இதையடுத்து, தண்ணீர் குடிப்பதில்லையா என்று ஆக்மேன் கேட்டபோது, கடந்த 48 ஆண்டுகளாகத் தண்ணீர் குடிக்கவில்லை என்று பஃபெட் தெரிவித்ததாகக் கூறப்படுகிறது.

தினமும் 5 கேன் கோக்!

வாரன் பஃபெட்டுக்கு செர்ரி கோக் மிகவும் பிடித்தமான பானமாக உள்ளது. அவர் ஒரு நாளைக்கு சுமார் 5 கேன்கள் கோக் குடிப்பதாக முன்பு தெரிவித்திருந்தார்.

தனது தினசரி உணவில் எடுத்துக்கொள்ளும் சுமார் 2,700 கலோரிகளில் நான்கில் ஒரு பங்கு கோக் பானத்தின் மூலம் கிடைப்பதாகவும் அவர் ஒருமுறை கூறியிருந்தார்.

பெப்சியில் இருந்து கோக்கிற்கு மாறிய கதை

வாரன் பஃபெட் ஆரம்பத்தில் பல ஆண்டுகளாக பெப்சி குடித்து வந்துள்ளார். பின்னர், 1985-ஆம் ஆண்டில் அவரது பக்கத்து வீட்டுக்காரர் ஒருவர் செர்ரி கோக் பானத்தை அறிமுகப்படுத்தியதைத் தொடர்ந்து, அவர் கோக் குடிக்கத் தொடங்கியதாகக் கூறப்படுகிறது.

1986-ஆம் ஆண்டு பெர்க்ஷயர் ஹாத்வே நிறுவனத்தின் ஆண்டு கூட்டத்தில் செர்ரி கோக்கை அதிகாரப்பூர்வ பானமாக அறிவித்தார். அதன்பிறகு 1988-ஆம் ஆண்டு அவரது நிறுவனம் கோகோ-கோலா நிறுவனத்தில் பெரிய அளவில் முதலீடு செய்தது.

வாரன் பஃபெட்டின் இந்த வித்தியாசமான பழக்கம் தற்போது சமூக வலைதளங்களிலும் பேசுபொருளாகியுள்ளது.

குறிப்பு: இது வாரன் பஃபெட்டின் தனிப்பட்ட பானப் பழக்கம் குறித்த செய்தி மட்டுமே. தண்ணீருக்குப் பதிலாக குளிர்பானங்களைப் பருகுவது ஆரோக்கியமான பழக்கம் என்று இதைப் பொருள் கொள்ளக்கூடாது.