புதுக்கோட்டை மாவட்டத்தில் ரூ.100 கோடி மதிப்பிலான அரசு நலத்திட்ட உதவிகளை முதலமைச்சர் விஜய் வழங்கினார். மேலும், பல்வேறு புதிய திட்டங்களுக்கு அடிக்கல் நாட்டியதுடன், முடிவுற்ற திட்டப் பணிகளையும் பொதுமக்கள் பயன்பாட்டிற்காக தொடங்கி வைத்தார்.
தமிழக முதலமைச்சர் விஜய் இன்று (நவம்பர் 2) புதுக்கோட்டை மாவட்டத்திற்கு அரசு முறைப் பயணம் மேற்கொண்டார். இதற்காக சென்னையில் இருந்து விமானம் மூலம் திருச்சி சென்ற அவர், அங்கிருந்து சாலை மார்க்கமாக புதுக்கோட்டைக்கு வந்தடைந்தார்.
புதுக்கோட்டையில் முதலமைச்சர் விஜய்க்கு வரவேற்பு
முதலமைச்சர் விஜய் புதுக்கோட்டை வந்தடைந்ததும், மாவட்ட நிர்வாகம் மற்றும் காவல்துறை சார்பில் வரவேற்பு அளிக்கப்பட்டது. மாவட்ட ஆட்சியர் அலுவலகத்தில் நடைபெற்ற நிகழ்ச்சியில் பாரம்பரிய பயிர் வகைகளின் கண்காட்சி மற்றும் மகளிர் சுயஉதவிக் குழுக்களின் சுயதொழில் கண்காட்சியை முதலமைச்சர் பார்வையிட்டார்.
மேலும், அங்கிருந்த விவசாயிகளுடன் கலந்துரையாடினார்.
14 ஆயிரம் பயனாளிகளுக்கு ரூ.100 கோடி நலத்திட்ட உதவிகள்
புதுக்கோட்டை மாவட்டத்தில் சுமார் 14 ஆயிரம் பயனாளிகளுக்கு ரூ.100 கோடிக்கும் அதிகமான மதிப்பிலான அரசு நலத்திட்ட உதவிகள் வழங்கப்பட்டன.
இதில் வீட்டு மனைப் பட்டா, இலவச தையல் இயந்திரங்கள், வங்கிக் கடன் உதவிகள், டிராக்டர்கள், வேளாண் கருவிகள் மற்றும் கல்விக் கடன் உள்ளிட்ட பல்வேறு நலத்திட்ட உதவிகள் இடம்பெற்றன.
நிகழ்ச்சியில் 104 பயனாளிகளுக்கு இலவச வீட்டுமனைப் பட்டா, தையல் இயந்திரங்கள், வங்கிக் கடன் உதவிகள் உள்ளிட்ட பல்வேறு உதவிகளை முதலமைச்சர் வழங்கினார்.
ரூ.23.25 கோடியில் புதிய பேருந்து நிலையம் திறப்பு
புதுக்கோட்டை நகரில் ரூ.23 கோடியே 25 லட்சம் செலவில் கட்டப்பட்டுள்ள நவீன பேருந்து நிலையத்தை முதலமைச்சர் விஜய் திறந்து வைத்து பொதுமக்கள் பயன்பாட்டிற்கு அர்ப்பணித்தார்.
இதன் மூலம் புதுக்கோட்டை நகரம் மற்றும் சுற்றுவட்டாரப் பகுதிகளைச் சேர்ந்த பயணிகளுக்கு மேம்பட்ட போக்குவரத்து வசதி கிடைக்கும் என எதிர்பார்க்கப்படுகிறது.
ரூ.8 கோடியில் உள்விளையாட்டு அரங்கம்
மேலும், ரூ.8 கோடி செலவில் கட்டப்பட்டுள்ள புதிய பல்நோக்கு உள்விளையாட்டு அரங்கத்தையும் முதலமைச்சர் திறந்து வைத்தார். இதனுடன் பல்வேறு துறைகளின் சார்பில் நிறைவு செய்யப்பட்ட திட்டங்களையும் தொடங்கி வைத்தார்.
புதுக்கோட்டை மாவட்டத்தின் வளர்ச்சியை முன்னிட்டு பல்வேறு புதிய திட்டங்களுக்கும் அடிக்கல் நாட்டப்பட்டுள்ளதாக தெரிவிக்கப்பட்டுள்ளது.
