சென்னை சர்வதேச விமான நிலையத்தின் நிர்வாகம் மற்றும் பராமரிப்பு பணிகளை தனியார் நிறுவனத்திடம் ஒப்படைப்பது குறித்து மத்திய அரசு தீவிரமாக பரிசீலித்து வருவதாக தகவல் வெளியாகியுள்ளது.
சென்னை விமான நிலையத்தை பொது-தனியார் பங்களிப்பு (PPP) முறையில் நீண்டகால குத்தகைக்கு தனியார் நிறுவனத்திடம் வழங்கி, அதன் செயல்பாடுகள் மற்றும் அடுத்தகட்ட வளர்ச்சியை மேம்படுத்த மத்திய அரசு திட்டமிட்டு வருவதாக கூறப்படுகிறது.
உலகத் தரத்தில் விமான நிலையம்
டெல்லி, மும்பை, பெங்களூரு, ஐதராபாத் உள்ளிட்ட நாட்டின் முக்கிய பெருநகர விமான நிலையங்கள் தற்போது தனியார் நிறுவனங்களின் நிர்வாகத்தில் செயல்பட்டு வருகின்றன. அந்த வரிசையில் சென்னையையும் கொண்டு வருவதன் மூலம் விமான நிலையத்தின் சேவைத் தரம் மற்றும் பயணிகளுக்கான வசதிகளை சர்வதேச தரத்திற்கு உயர்த்த முடியும் என மத்திய அரசு கருதுகிறது.
தமிழக முதலமைச்சர் கோரிக்கை
சென்னை விமான நிலையத்தின் தற்போதைய உள்கட்டமைப்பு மற்றும் பயணிகள் வசதிகளை மேம்படுத்த வேண்டிய அவசியம் குறித்து தமிழக முதலமைச்சர் சி. ஜோசப் விஜய், பிரதமர் நரேந்திர மோடிக்கு கடந்த ஆகஸ்ட் மாதம் கடிதம் எழுதியிருந்ததாக தெரிவிக்கப்பட்டுள்ளது.
தமிழ்நாட்டின் தொழில் மற்றும் முதலீட்டு வளர்ச்சிக்கு ஏற்ப சர்வதேச தரத்திலான விமான நிலைய வசதிகள் தேவை என்றும், இந்திய விமான நிலையங்கள் ஆணையத்துக்கு (AAI) பதிலாக தகுதியான புதிய ஆபரேட்டரை நியமிக்க வேண்டும் என்றும் அந்தக் கடிதத்தில் வலியுறுத்தப்பட்டதாக கூறப்படுகிறது.
இதன் தொடர்ச்சியாக சென்னை விமான நிலையத்தை PPP முறையில் தனியார் நிறுவனத்திடம் ஒப்படைப்பது குறித்து மத்திய சிவில் விமானப் போக்குவரத்து அமைச்சகம் பரிசீலித்து வருவதாக தகவல்கள் தெரிவிக்கின்றன.
3.5 கோடி பயணிகள் கையாளும் வகையில் திறன் உயர்வு
2025-26 நிதியாண்டில் சென்னை விமான நிலையம் சுமார் 2.30 கோடி பயணிகளை கையாண்டுள்ளது. விமான நிலையத்தின் உள்கட்டமைப்பு விரிவாக்கப் பணிகள் நடைபெற்று வரும் நிலையில், எதிர்காலத்தில் ஆண்டுக்கு சுமார் 3.5 கோடி பயணிகளை கையாளும் அளவுக்கு அதன் திறனை அதிகரிக்க திட்டமிடப்பட்டுள்ளது.
எந்தப் பணிகள் தனியாரிடம் செல்லும்?
தனியார் நிறுவனத்திடம் நிர்வாகப் பொறுப்பு வழங்கப்பட்டாலும், விமான நிலையத்தின் அனைத்து அதிகாரங்களும் தனியாரிடம் சென்றுவிடாது.
தினசரி விமான நிலைய செயல்பாடுகள், வணிக வளாகங்களின் நிர்வாகம், வாகன நிறுத்துமிடங்கள் மற்றும் பயணிகளுக்கான பல்வேறு வசதிகளை மேம்படுத்துதல் உள்ளிட்ட பணிகளை தனியார் நிறுவனம் மேற்கொள்ளும் வகையில் திட்டம் அமையலாம்.
அதே நேரத்தில், விமானப் போக்குவரத்துக் கட்டுப்பாடு, பாதுகாப்பு மற்றும் வான்வழிப் போக்குவரத்து தொடர்பான முக்கியமான பணிகள் மத்திய அரசின் கட்டுப்பாட்டிலேயே தொடரும் என தெரிவிக்கப்பட்டுள்ளது.
கொல்கத்தா விமான நிலையமும் தனியார் வசமா?
சென்னை விமான நிலையத்துடன் கொல்கத்தா விமான நிலையத்தையும் இதே பொது-தனியார் பங்களிப்பு முறையில் தனியார் நிறுவனங்களிடம் ஒப்படைப்பது குறித்து மத்திய அரசு திட்டமிட்டு வருவதாக கூறப்படுகிறது.
இதன் மூலம் நாட்டின் முக்கிய பெருநகர விமான நிலையங்களை நவீனப்படுத்தி, பயணிகளுக்கு மேம்பட்ட சேவைகளை வழங்குவதுடன், விமானப் போக்குவரத்து வளர்ச்சிக்கு ஏற்ப உள்கட்டமைப்பை வலுப்படுத்த மத்திய அரசு நடவடிக்கை எடுத்து வருவதாக தெரிகிறது.
