தகவல் அறியும் உரிமைச் சட்டத்தின் கீழ் பொதுமக்கள் தாக்கல் செய்யும் மனுக்களுக்கு உரிய காலக்கெடுவுக்குள் துல்லியமான தகவல்களை வழங்க வேண்டும் என பள்ளிக்கல்வித்துறை அறிவுறுத்தியுள்ளது.
மாவட்ட முதன்மைக் கல்வி அலுவலர்களுக்கு சுற்றறிக்கை
இதுதொடர்பாக பள்ளிக்கல்வித்துறை இயக்குநரகம் சார்பில் அனைத்து மாவட்ட முதன்மைக் கல்வி அலுவலர்களுக்கும் சுற்றறிக்கை அனுப்பப்பட்டுள்ளது. ஆர்டிஐ மனுக்களுக்கு பதிலளிக்கும்போது, மனுதாரர் கேட்டுள்ள தகவல்களை தெளிவாகவும், சரியாகவும் வழங்க வேண்டும் என அதில் அறிவுறுத்தப்பட்டுள்ளது.
தகவல் கோரி தாக்கல் செய்யப்பட்ட மனு
திருவண்ணாமலை மாவட்ட ஆட்சியர் அலுவலகத்தில் நடைபெற்ற குறைதீர்க்கும் கூட்டத்தில் அளிக்கப்பட்ட மனுக்கள் தொடர்பாக எடுக்கப்பட்ட நடவடிக்கைகள் குறித்து, செங்கல்பட்டு மாவட்டத்தைச் சேர்ந்த கோபிநாத் என்பவர் தகவல் அறியும் உரிமைச் சட்டத்தின் கீழ் தகவல் கோரியிருந்தார்.
அவரது மனுவுக்கு திருவண்ணாமலை மாவட்ட முதன்மைக் கல்வி அலுவலக பொதுத் தகவல் அலுவலர் அளித்த பதில் திருப்திகரமாக இல்லை எனக் கூறி, கோபிநாத் மாநில தகவல் ஆணையத்தில் மேல்முறையீடு செய்தார்.
மாநில தகவல் ஆணையம் உத்தரவு
இந்த மேல்முறையீட்டை விசாரித்த மாநில தகவல் ஆணையம், கடந்த செப்டம்பர் 24-ம் தேதி உத்தரவு பிறப்பித்தது. அதில், ஆர்டிஐ சட்டத்தின் கீழ் பெறப்படும் மனுக்களுக்கு சம்பந்தப்பட்ட அலுவலர்கள் சட்டத்தில் குறிப்பிடப்பட்டுள்ள காலக்கெடுவுக்குள் உரிய தகவல்களை வழங்க வேண்டும் என அறிவுறுத்தப்பட்டது.
தெளிவான தகவல் வழங்க வேண்டும்
மனுதாரருக்கு தேவையான தகவல்கள் புரியும் வகையில், தெளிவான மற்றும் துல்லியமான பதிலை வழங்க வேண்டும் என்றும் மாநில தகவல் ஆணையம் வலியுறுத்தியுள்ளது.கேட்கப்பட்ட தகவல்களை தவிர்த்து பொதுவான பதில்களை வழங்குவதை தவிர்த்து, மனுவில் கோரப்பட்ட விவரங்களுக்கு நேரடியாக பதிலளிக்க வேண்டும் எனவும் அறிவுறுத்தப்பட்டுள்ளது.
அனைத்து மாவட்டங்களிலும் பின்பற்ற உத்தரவு
மாநில தகவல் ஆணையத்தின் உத்தரவை அனைத்து மாவட்ட முதன்மைக் கல்வி அலுவலர்களும் முறையாகப் பின்பற்ற வேண்டும் என பள்ளிக்கல்வித்துறை தெரிவித்துள்ளது.
ஆர்டிஐ மனுக்களுக்கு பதிலளிப்பதில் காலதாமதம் ஏற்படாமல் இருப்பதுடன், பொதுமக்கள் கோரும் தகவல்களுக்கு பொருத்தமான, துல்லியமான மற்றும் தெளிவான பதில்களை வழங்குவதை அலுவலர்கள் உறுதி செய்ய வேண்டும் என பள்ளிக்கல்வித்துறை அறிவுறுத்தியுள்ளது.
