தமிழ்நாடு அரசின் புதிய நலத்திட்டமான தாய்மாமன் தங்க மோதிரம் திட்டம் (Thaimaman Gold Ring) வரும் செப்டம்பர் 28ஆம் தேதி மதுரை மாவட்டம் உசிலம்பட்டியில் தொடங்கப்பட உள்ளது.
இதற்கான முன்னேற்பாடுகள் தீவிரமாக நடைபெற்று வரும் நிலையில், முதல் கட்டமாக 1,106 தங்க மோதிரங்கள் உசிலம்பட்டி அரசு மருத்துவமனைக்கு கொண்டு வரப்பட்டுள்ளதாக தகவல் வெளியாகியுள்ளது.
அரசு மருத்துவமனையில் பிறக்கும் குழந்தைகளுக்கு தங்க மோதிரம்
இந்தத் திட்டத்தின் கீழ் அரசு மருத்துவமனைகளில் பிறக்கும் ஒவ்வொரு குழந்தைக்கும் *ஒரு கிராம் எடையுள்ள தங்க மோதிரம்* வழங்கப்பட உள்ளது.
மேலும், கடந்த ஜூன் 22, 2026 முதல் அரசு மருத்துவமனைகளில் பிறந்த குழந்தைகளும் இத்திட்டத்தின் பயனைப் பெறும் வகையில் அரசு அறிவித்துள்ளது. இதற்கான அரசாணை ஜூன் 23ஆம் தேதி வெளியிடப்பட்டதாக தெரிவிக்கப்பட்டுள்ளது.
உசிலம்பட்டியில் தொடக்க விழா
தாய்மாமன் தங்க மோதிரம்’ திட்டத்தை முதலமைச்சர் விஜய் செப்டம்பர் 28ஆம் தேதி உசிலம்பட்டியில் தொடங்கி வைக்க உள்ளார். இதையொட்டி உசிலம்பட்டி அரசு மருத்துவமனையில் அதிகாரிகள் நேரில் ஆய்வு செய்து, நிகழ்ச்சிக்கான ஏற்பாடுகளை கண்காணித்து வருகின்றனர்.
திட்டத்தின் முதல் கட்டமாக மாநில அளவில் *1.28 லட்சம் தங்க மோதிரங்கள் கொள்முதல் செய்யப்பட்டுள்ளதாக* தகவல்கள் தெரிவிக்கின்றன. ஒவ்வொரு மோதிரத்திற்கும் தனித்துவமான வரிசை எண் மற்றும் பாதுகாப்பான பேக்கேஜிங் வழங்கப்பட உள்ளது.
உசிலம்பட்டியை தேர்வு செய்தது ஏன்?
மதுரை மற்றும் குறிப்பாக உசிலம்பட்டி பகுதிகளில் தாய்மாமன் சீர் வழங்கும் பாரம்பரியம் முக்கியத்துவம் பெற்றுள்ளது. இந்த பண்பாட்டு பின்னணியை பிரதிபலிக்கும் வகையில், திட்டத்தின் தொடக்க நிகழ்ச்சிக்கு உசிலம்பட்டி தேர்வு செய்யப்பட்டதாக தகவல்கள் தெரிவிக்கின்றன.
அனைத்து குழந்தைகளுக்கும் வழங்கப்படும்
அரசு மருத்துவமனைகளில் பிறக்கும் குழந்தைகளுக்கு பாலின வேறுபாடின்றி தங்க மோதிரம் வழங்கப்படும் என தெரிவிக்கப்பட்டுள்ளது. இதற்காக தகுதியான பயனாளிகள் தொடர்பான பதிவுகள் மற்றும் ஆவண சரிபார்ப்பு உள்ளிட்ட பணிகளும் மேற்கொள்ளப்பட்டு வருகின்றன.
செப்டம்பர் 28ஆம் தேதி நடைபெற உள்ள தொடக்க விழாவைத் தொடர்ந்து, திட்டம் மாநிலம் முழுவதும் நடைமுறைக்கு வர உள்ளது.
