தலைமைத் தேர்தல் ஆணையர் ஞானேஷ் குமாரை நீக்க வலியுறுத்தி டெல்லியில் இந்தியா கூட்டணி பேரணி!

டெல்லி ராம்லீலா மைதானத்தில் திரண்ட எதிர்க்கட்சிகள் – வாக்காளர் பட்டியல் சிறப்பு தீவிரத் திருத்தம் தொடர்பாகக் கண்டனம்.

தலைமைத் தேர்தல் ஆணையர் ஞானேஷ் குமாரை பதவியில் இருந்து நீக்க வலியுறுத்தி, எதிர்க்கட்சிகளின் இந்தியா கூட்டணி சார்பில் டெல்லியில் இன்று (நவம்பர் 1) பிரமாண்டப் பேரணி நடைபெறுகிறது.

டெல்லி ராம்லீலா மைதானத்தில் நடைபெறும் இந்தப் பேரணிக்கு ‘வாக்கைக் காப்போம், நாட்டைக் காப்போம்’ (Vote Bachao, Desh Bachao) எனப் பெயரிடப்பட்டுள்ளது. காங்கிரஸ் உள்ளிட்ட இந்தியா கூட்டணிக் கட்சிகளின் தலைவர்கள், தொண்டர்கள், மாணவர்கள் மற்றும் சமூக அமைப்புகளைச் சேர்ந்தவர்கள் இதில் பங்கேற்க உள்ளனர்.

ஞானேஷ் குமாருக்கு எதிராக எதிர்க்கட்சிகள் போராட்டம்

வாக்காளர் பட்டியலில் மேற்கொள்ளப்படும் சிறப்பு தீவிரத் திருத்தப் பணிகளில் (SIR) முறைகேடுகள் நடைபெறுவதாக எதிர்க்கட்சிகள் குற்றம்சாட்டி வருகின்றன. வாக்காளர் பட்டியலில் இருந்து பெயர்கள் நீக்கப்படுவது உள்ளிட்ட புகார்களுக்கு தேர்தல் ஆணையம் உரிய விளக்கம் அளிக்க வேண்டும் என்றும், தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்றும் எதிர்க்கட்சிகள் வலியுறுத்துகின்றன.

இதன் தொடர்ச்சியாக, ஞானேஷ் குமாருக்கு எதிராக அடையாளப் பதவி நீக்க நிகழ்ச்சியையும் இந்தியா கூட்டணிக் கட்சிகள் நடத்தியுள்ளன. இதையடுத்து பொதுக்கூட்டம் மற்றும் பேரணி நடத்த ஏற்பாடு செய்யப்பட்டுள்ளது.

ராகுல் காந்தி உள்ளிட்ட தலைவர்கள் பங்கேற்பு

காங்கிரஸ் தலைவர் மல்லிகார்ஜுன கார்கே, மக்களவை எதிர்க்கட்சித் தலைவர் ராகுல் காந்தி உள்ளிட்ட இந்தியா கூட்டணியின் முக்கியத் தலைவர்கள் பேரணியில் பங்கேற்க உள்ளனர். நாடு முழுவதிலும் இருந்து கட்சித் தொண்டர்கள் டெல்லிக்கு வந்துள்ளனர்.

டெல்லியில் பலத்த பாதுகாப்பு

பேரணியை முன்னிட்டு ராம்லீலா மைதானம் மற்றும் அதைச் சுற்றியுள்ள பகுதிகளில் பலத்த பாதுகாப்பு ஏற்பாடுகள் செய்யப்பட்டுள்ளன. 4,000-க்கும் மேற்பட்ட காவல்துறையினர் மற்றும் மத்திய ஆயுதக் காவல் படையினர் பாதுகாப்புப் பணியில் ஈடுபடுத்தப்பட்டுள்ளனர். 200-க்கும் மேற்பட்ட கண்காணிப்பு கேமராக்கள், ட்ரோன்கள் மூலமும் கண்காணிப்பு மேற்கொள்ளப்படுகிறது.

தேர்தல் நடைமுறைகள் மற்றும் வாக்காளர் பட்டியல் திருத்தம் தொடர்பான எதிர்க்கட்சிகளின் இந்தப் போராட்டம் தேசிய அரசியலில் கவனம் பெற்றுள்ளது.