இந்தியாவில் 2027-ம் ஆண்டு நடைபெற உள்ள மக்கள் தொகை கணக்கெடுப்பின் இரண்டாம் கட்டத்தில், பொதுமக்களிடம் கேட்கப்பட வேண்டிய 40 கேள்விகளை மத்திய அரசு அறிவித்துள்ளது. மக்களின் தனிப்பட்ட விவரங்கள், கல்வி, வேலைவாய்ப்பு, இடம்பெயர்வு, குடும்ப விவரங்கள் உள்ளிட்ட பல்வேறு தகவல்கள் இந்தக் கணக்கெடுப்பின் மூலம் சேகரிக்கப்பட உள்ளன.
இந்தியாவில் நடைபெற உள்ள மக்கள் தொகை கணக்கெடுப்பு முதல் முறையாக முழுமையான டிஜிட்டல் முறையில் மேற்கொள்ளப்பட உள்ளது. இதற்கான கேள்விகள் மக்கள் தொகை கணக்கெடுப்பு சட்டத்தின் கீழ் அறிவிக்கப்பட்டுள்ளன.
மக்கள் தொகை கணக்கெடுப்பில் கேட்கப்படும் 40 கேள்விகள் கணக்கெடுப்பின் இரண்டாம் கட்டத்தில், ஒவ்வொரு நபரின் விவரங்களையும் சேகரிக்கும் வகையில் கேள்விகள் அமைக்கப்பட்டுள்ளன.
1. தனிநபர் மற்றும் குடும்ப விவரங்கள்
நபரின் பெயர் என்ன?
குடும்பத் தலைவருடன் உள்ள உறவுமுறை என்ன?
பாலினம் என்ன?
பிறந்த தேதி மற்றும் வயது என்ன?
தற்போதைய திருமண நிலை என்ன?
திருமணமானபோது வயது என்ன?
கணவர் அல்லது மனைவியின் பெயர் என்ன?
அறிவிக்கப்பட்ட தேசிய இனம் எது?
எந்த மதத்தைச் சேர்ந்தவர்?
பட்டியலிடப்பட்ட சாதி (SC), பழங்குடியினர் (ST) அல்லது பிற சாதி விவரம் என்ன?
2. பெற்றோர், மொழி மற்றும் கல்வி
தந்தையின் விவரங்கள் என்ன?
தாயின் விவரங்கள் என்ன?
மாற்றுத்திறன் உள்ளதா?
தாய்மொழி மற்றும் தெரிந்த பிற மொழிகள் என்ன?
கல்வியறிவு மற்றும் டிஜிட்டல் கல்வியறிவு நிலை என்ன?
கல்வி நிறுவனத்தில் தற்போது படிக்கிறாரா?
பெற்றுள்ள உயர்ந்த கல்வித் தகுதி மற்றும் படிப்புப் பிரிவு என்ன?
3. வேலைவாய்ப்பு மற்றும் தொழில் விவரங்கள்
கடந்த ஓராண்டில் ஏதேனும் வேலை செய்துள்ளாரா?
பொருளாதார நடவடிக்கையின் வகை என்ன?
தொழில் என்ன?
தொழில், வணிகம் அல்லது சேவையின் தன்மை என்ன?
பணியாளரின் வகை என்ன?
வேலை செய்யாதவர்கள் அல்லது குறைவாக வேலை செய்பவர்களின் பொருளாதாரம் சாராத செயல்பாடு என்ன?
வேலை தேடுகிறாரா அல்லது வேலைக்குத் தயாராக உள்ளாரா?
வேலை செய்யும் இடத்திற்குச் செல்வது தொடர்பான விவரங்கள் என்ன?
4. பிறந்த இடம் மற்றும் இடம்பெயர்வு
பிறந்த இடம் எது?
கடைசியாக வசித்த இடம் எது?
இடம்பெயர்ந்ததற்கான காரணம் என்ன?
தற்போதைய ஊரில் அல்லது நகரத்தில் கடைசியாக இடம்பெயர்ந்ததிலிருந்து எவ்வளவு காலமாக வசிக்கிறார்?
நிரந்தர வசிப்பிட முகவரி என்ன?
5. குழந்தைகள் தொடர்பான விவரங்கள்
இந்தக் கேள்விகள் குறிப்பிட்ட திருமண நிலைகளில் உள்ள பெண்களிடம் கேட்கப்படும்.
தற்போது உயிருடன் உள்ள குழந்தைகள் எத்தனை பேர்?
இதுவரை உயிருடன் பிறந்த குழந்தைகள் மொத்தம் எத்தனை பேர்?
கடந்த ஓராண்டில் உயிருடன் பிறந்த குழந்தைகள் எத்தனை பேர்?
6. தடுப்பூசி மற்றும் அடையாள விவரங்கள்
கோவிட்-19 தடுப்பூசி எந்த இடத்தில் செலுத்தப்பட்டது?
மொத்தம் எத்தனை வங்கிக் கணக்குகள் உள்ளன?
மொபைல் எண் என்ன? (இருந்தால்)
ஆதார் எண் என்ன? (இருந்தால்)
வாக்காளர் அடையாள அட்டை எண் என்ன? (இருந்தால்)
இந்தியக் கடவுச்சீட்டு வைத்திருப்பவராக இருந்தால், பாஸ்போர்ட் எண் என்ன?
ஓட்டுநர் உரிமம் உள்ளதா?
எப்போது கணக்கெடுப்பு நடைபெறும்?
மக்கள் தொகை கணக்கெடுப்பு 2027 இரண்டு கட்டங்களாக நடைபெறுகிறது. முதல் கட்டத்தில் வீடுகள், குடியிருப்புகளின் நிலை, அடிப்படை வசதிகள் மற்றும் குடும்பச் சொத்துகள் குறித்த விவரங்கள் சேகரிக்கப்படுகின்றன. இரண்டாம் கட்டத்தில் மக்களின் தனிநபர், சமூக, கல்வி, வேலைவாய்ப்பு மற்றும் இடம்பெயர்வு தொடர்பான தகவல்கள் சேகரிக்கப்படும். இந்த இரண்டாம் கட்டம் பெரும்பாலான பகுதிகளில் 2027-ம் ஆண்டு ஜனவரி மற்றும் பிப்ரவரி மாதங்களில் நடைபெறத் திட்டமிடப்பட்டுள்ளது.
இந்தக் கணக்கெடுப்பின் மூலம் கிடைக்கும் தகவல்கள் நாட்டின் வளர்ச்சித் திட்டங்கள் மற்றும் அரசின் கொள்கைகளை வகுப்பதற்குப் பயன்படும்.
பொதுமக்களின் தகவல்கள் பாதுகாப்பாக இருக்குமா?
மக்கள் தொகை கணக்கெடுப்பின்போது சேகரிக்கப்படும் தனிநபர் விவரங்கள் சட்டப்படி ரகசியமாகப் பாதுகாக்கப்படுகின்றன. அவை புள்ளிவிவர ஆய்வு மற்றும் கொள்கைத் திட்டமிடலுக்குப் பயன்படுத்தப்படுகின்றன. எனவே, கணக்கெடுப்பின்போது அதிகாரிகளிடம் சரியான தகவல்களை வழங்குவது முக்கியமாகும்.
