ரேஷன் கடைகளில் கிலோ ரூ.35க்கு வெங்காயம் விற்பனை! செப்டம்பர் 3 முதல் அமல்

வெங்காய விலை உயர்வை கட்டுப்படுத்த தமிழக அரசு அதிரடி நடவடிக்கை

தமிழகத்தில் வெங்காயத்தின் விலை உயர்ந்து வரும் நிலையில், பொதுமக்களுக்கு குறைந்த விலையில் வெங்காயம் கிடைக்க தமிழக அரசு புதிய நடவடிக்கையை அறிவித்துள்ளது. அதன்படி, வரும் செப்டம்பர் 3-ம் தேதி முதல் நகர்ப்புற ரேஷன் கடைகளில் ஒரு கிலோ வெங்காயம் ரூ.35க்கு விற்பனை செய்யப்பட உள்ளது.

உணவுப்பொருள் பாதுகாப்புத்துறை அமைச்சர் வெங்கடரமணன் சட்டப்பேரவையில் இதுகுறித்த அறிவிப்பை வெளியிட்டார்.

வெளிச்சந்தையில் ரூ.56 முதல் ரூ.60 வரை விற்பனை

மத்தியப் பிரதேசம் மற்றும் மகாராஷ்டிரா உள்ளிட்ட முக்கிய வெங்காய உற்பத்தி மாநிலங்களில் இருந்து வரத்து குறைந்துள்ளதால், வெளிச்சந்தையில் வெங்காயத்தின் விலை தற்போது கிலோ ரூ.56 முதல் ரூ.60 வரை விற்பனை செய்யப்படுவதாக அமைச்சர் தெரிவித்தார். போக்குவரத்து செலவு அதிகரிப்பும் காய்கறிகளின் விலை உயர்வுக்கு ஒரு காரணமாக கூறப்பட்டுள்ளது.

1,000 மெட்ரிக் டன் வெங்காயம் கொள்முதல்

விலை உயர்வைக் கட்டுப்படுத்தும் நோக்கில், தேசிய வேளாண்மை கூட்டுறவு விற்பனை நிலையம் மற்றும் தேசிய கூட்டுறவு நுகர்வோர் கூட்டமைப்பு மூலம் முதற்கட்டமாக 1,000 மெட்ரிக் டன் வெங்காயம் கொள்முதல் செய்யப்பட்டுள்ளது.

இந்த வெங்காயம் கூட்டுறவு விற்பனை நிலையங்கள், அமுதம் அங்காடிகள் மற்றும் நகர்ப்புறங்களில் உள்ள நியாயவிலைக் கடைகள் மூலம் பொதுமக்களுக்கு விற்பனை செய்யப்பட உள்ளது.

குடும்ப அட்டைக்கு 1 கிலோ

முதற்கட்டமாக நகர்ப்புறங்களில் உள்ள 8,739 நியாயவிலைக் கடைகள் மூலம் சுமார் 80 லட்சம் குடும்ப அட்டைதாரர்கள் பயன்பெறும் வகையில் திட்டம் செயல்படுத்தப்பட உள்ளது.

ஒரு குடும்ப அட்டைக்கு 1 கிலோ வெங்காயம் ரூ.35க்கு வழங்கப்படும் என அறிவிக்கப்பட்டுள்ளது. தேவையைப் பொறுத்து கூடுதல் வெங்காயம் கொள்முதல் செய்து விநியோகிக்கவும் நடவடிக்கை எடுக்கப்படும்.

பொதுமக்களுக்கு நிம்மதி

வெங்காய விலை தொடர்ந்து உயர்ந்து வரும் சூழலில், ரேஷன் கடைகள் மூலம் குறைந்த விலையில் வெங்காயம் விற்பனை செய்யப்படுவது பொதுமக்களுக்கு, குறிப்பாக ஏழை மற்றும் நடுத்தர குடும்பங்களுக்கு, நிவாரணமாக அமையும் என எதிர்பார்க்கப்படுகிறது.