கே.என்.நேரு தொடர்புடைய 19 இடங்களில் லஞ்ச ஒழிப்புத்துறை சோதனை

தி.மு.க. முன்னாள் அமைச்சரும், அக்கட்சியின் முதன்மைச் செயலாளருமான கே.என்.நேரு மற்றும் அவரது சகோதரர் கே.என்.ரவிச்சந்திரனுடன் தொடர்புடைய இடங்களில் லஞ்ச ஒழிப்புத்துறை அதிகாரிகள் சனிக்கிழமை காலை முதல் சோதனை நடத்தி வருகின்றனர்.

திருச்சி வீட்டில் சோதனை

திருச்சி தில்லைநகரில் உள்ள கே.என்.நேருவின் வீட்டில் அதிகாலை முதலே லஞ்ச ஒழிப்புத்துறை அதிகாரிகள் சோதனை மேற்கொண்டனர்.

சென்னையில் மயிலாப்பூர், ஆர்.ஏ.புரம், ஆழ்வார்பேட்டை, திருவான்மியூர், அண்ணா நகர், அபிராமபுரம் உள்ளிட்ட பகுதிகளிலும் சோதனை நடைபெற்று வருகிறது.

மொத்தம் 19 இடங்களில் இந்தச் சோதனை நடைபெற்று வருவதாக தகவல் வெளியாகியுள்ளது.

சகோதரர் ரவிச்சந்திரன் தொடர்புடைய இடங்களிலும் சோதனை

கே.என்.நேருவின் சகோதரர் ரவிச்சந்திரனுடன் தொடர்புடைய இடங்களிலும் அதிகாரிகள் சோதனை நடத்தி வருகின்றனர்.

அபிராமபுரத்தில் உள்ள அவரது வீட்டிலும், கட்டுமான நிறுவன அலுவலகம் உள்ளிட்ட சில இடங்களிலும் சோதனை நடைபெற்று வருவதாக தெரிவிக்கப்பட்டுள்ளது.

எதற்காக இந்த சோதனை?

கே.என்.நேரு நகராட்சி நிர்வாகம் மற்றும் குடிநீர் வழங்கல் துறை அமைச்சராக இருந்த காலகட்டத்தில், அந்தத் துறையில் நடைபெற்றதாகக் கூறப்படும் வேலைவாய்ப்பு முறைகேடுகள், ஒப்பந்தங்கள் மற்றும் பணியிட மாற்றங்கள் தொடர்பான புகார்கள் குறித்து விசாரணை நடைபெற்று வருகிறது.

அமலாக்கத்துறை பகிர்ந்த தகவல்களின் அடிப்படையில் இந்த விவகாரம் தொடர்பாக லஞ்ச ஒழிப்புத்துறை வழக்குப்பதிவு செய்துள்ளதாக தகவல்கள் தெரிவிக்கின்றன.