விநாயகர் சிலையுடன் 7 பவுன் நகையை தவறவிட்ட மூதாட்டி: ஏரியில் தேடி மீட்ட போலீசார்

சென்னை பள்ளிக்கரணையில் விநாயகர் சிலைக்கு அணிவித்து பூஜை செய்த 7 பவுன் தங்க நெக்லஸை சிலையுடன் சேர்த்து தவறவிட்ட மூதாட்டி, பொதுமக்களின் உதவியுடன் போலீசார் நடத்திய தேடுதல் மூலம் நகையை மீண்டும் பெற்றார்.

விநாயகர் சிலைக்கு நகை அணிவித்து பூஜை

சென்னை அடுத்த பள்ளிக்கரணையை சேர்ந்தவர் கோகிலா (65). விநாயகர் சதுர்த்தியையொட்டி தனது வீட்டில் சிறிய விநாயகர் சிலையை வைத்து அவர் வழிபாடு செய்தார்.

விளம்பரம்:

அப்போது விநாயகர் சிலைக்கு 7 பவுன் தங்க நெக்லஸை அணிவித்து பூஜை செய்துள்ளார்.

பூஜை முடிந்த பிறகு, அந்த சிறிய விநாயகர் சிலையை அருகில் வைக்கப்பட்டிருந்த பெரிய விநாயகர் சிலை அருகே வைத்துவிட்டு கோகிலா வீட்டுக்குச் சென்றுள்ளார்.

நகை காணாமல் போனதால் அதிர்ச்சி

சிறிது நேரத்துக்குப் பிறகுதான் விநாயகர் சிலைக்கு அணிவித்திருந்த தங்க நெக்லஸ் அவரது நினைவுக்கு வந்துள்ளது.

விளம்பரம்:

இதையடுத்து பதறியபடி சம்பவ இடத்துக்குச் சென்று பார்த்தபோது, விநாயகர் சிலையையும் அதில் அணிவிக்கப்பட்டிருந்த 7 பவுன் நகையையும் காணவில்லை.

இதனால் அதிர்ச்சி அடைந்த கோகிலா, சம்பவம் குறித்து பள்ளிக்கரணை குற்றப்பிரிவு போலீசாரிடம் தெரிவித்துள்ளார்.

ஏரியில் சிலை கரைக்கப்பட்ட தகவல்

இதையடுத்து குற்றப்பிரிவு இன்ஸ்பெக்டர் நடராஜ் விசாரணை நடத்தினார்.

அப்போது அங்கு பெரிய விநாயகர் சிலை வைத்திருந்த பலராமனிடம் போலீசார் விசாரித்தனர். அங்கிருந்த சிறிய விநாயகர் சிலைகளை பள்ளிக்கரணை ஏரியில் கரைத்துவிட்டதாகவும், பூஜையில் பயன்படுத்தப்பட்ட பூக்களை அருகிலிருந்த குப்பையில் கொட்டியதாகவும் அவர் தெரிவித்ததாக கூறப்படுகிறது.

இதனால் தங்க நெக்லஸ் ஏரியில் இருக்கலாம் என போலீசார் சந்தேகித்தனர்.

பொதுமக்கள் உதவியுடன் போலீசார் தேடுதல்

இதையடுத்து போலீசார், அப்பகுதி பொதுமக்களின் உதவியுடன் தேடுதல் பணியில் ஈடுபட்டனர்.

குப்பைப் பகுதியிலும், பள்ளிக்கரணை ஏரியிலும் தேடுதல் நடத்தப்பட்டது. அப்போது ஏரியில் கிடந்த 7 பவுன் தங்க நெக்லஸ் மீட்கப்பட்டது.

மீட்கப்பட்ட நகை மூதாட்டி கோகிலாவிடம் பத்திரமாக ஒப்படைக்கப்பட்டது.

நீண்ட நேர தேடுதலுக்குப் பிறகு தனது நகை கிடைத்ததால் மகிழ்ச்சியடைந்த கோகிலா, நகையை மீட்ட போலீசாருக்கும் உதவிய பொதுமக்களுக்கும் கண்ணீர் மல்க நன்றி தெரிவித்தார்.