எம்.ஜி.ஆர்., ஜெயலலிதா போல நான் நடிக்கவில்லை – கட்சியினருக்கு எடப்பாடி பழனிசாமி கடிதம்!

2026 சட்டமன்றத் தேர்தலையொட்டி அ.தி.மு.க. பொதுச் செயலாளர் எடப்பாடி பழனிசாமி, மக்களைக் காப்போம் – தமிழகத்தை மீட்போம் என்ற பெயரில் எழுச்சிப் பயணத்தை மேற்கொண்டு வருகிறார். இதையொட்டி அவர், அ.தி.மு.க. தொண்டர்களுக்குக் கடிதம் ஒன்றை எழுதியுள்ளார்.

எடப்பாடி பழனிசாமி எழுதியுள்ள கடிதத்தின் முக்கிய அம்சங்கள்

• தி.மு.க. ஆட்சியில் ஒவ்வொருத் துறையிலும் அட்டூழியங்கள் நடக்கின்றன; பல நலத் திட்டங்கள் நிறுத்தப்பட்டுள்ளன; தேர்தல் வாக்குறுதிகள் நிறைவேற்றப் படவில்லை என்று மக்கள் புகார் தெரிவிக்கின்றனர்.

• வெற்று விளம்பரங்கள், மாயாஜால அறிவிப்புகள் மூலமே ஸ்டாலின் அரசு இயங்குகிறது; அதனால் மக்கள் கடும் கோபத்தில் உள்ளனர்.

• 2021 தேர்தலில், தி.மு.க. 525-க்கும் மேற்பட்ட வாக்குறுதிகள் அளித்திருந்தாலும், அவற்றில் பல முக்கியமானவை இன்னும் நிறைவேற்றப்படவில்லை.

• “கொலைமேற்கொண் டாரிற் கொடிதே அலைமேற்கொண்டு அல்லவை செய்தொழுகும் வேந்து” என்ற வள்ளுவரின் வாக்குப்படி, குடிமக்களை வருத்தும் ஆட்சி, கொலையாளியை விட கொடியது.

• 2026-இல் இந்தத் துயர ஆட்சிக்கு முடிவுரை எழுதி, “அம்மா மாடல் ஆட்சி” மீண்டும் ஏற்படுத்தப்படும்.

• எழுச்சிப் பயணத்தில் மக்கள் தரும் பேராதரவால் ஸ்டாலினுக்கு பொறாமை ஏற்பட்டுள்ளது.

• நான் எம்.ஜி.ஆர்., ஜெயலலிதா போல நடிக்கவில்லை. நான் மக்களில் ஒருவன்; சாதாரண தொண்டன். முன்கள வீரனாக எனது எழுச்சிப் பயணம் தொடரும்.

• தமிழக மக்களுக்கு நல்லாட்சி கிடைக்கும் வரை அ.தி.மு.க. தொண்டர்களுக்கும் எனக்கும் தூக்கம் இல்லை

இவ்வாறு எடப்பாடி பழனிசாமி தனது கடிதத்தில் குறிப்பிட்டுள்ளார்.